الماتىدا الاياقتار وزدەرىن ادىلەت دەپارتامەنتىنىڭ قىزمەتكەرلەرى رەتىندە تانىستىرادى.
ارام پيعىلدىلار وزدەرىن مەملەكەتتىك ورگان قىزمەتكەرلەرى رەتىندە تانىستىرادى. وسىعان بايلانىستى وڭىرلىك كوممۋنيكاسيالار قىزمەتى الاڭىندا الماتى قالاسى ادىلەت دەپارتامەنتى وكىلدەرىنىڭ قاتىسۋىمەن شۇعىل بريفينگ وتكىزىلدى.
الاياقتاردىڭ قالاي الداپ-اربايتىنىن اتقارۋ ءوندىرىسىن قامتاماسىز ەتۋ جونىندەگى ءبولىم باسشىسى ءانۋار جەكسەكوۆ ايتىپ بەردى.
«الاياقتار ءبىزدىڭ ازاماتتارىمىزعا تەلەفون سوعىپ، وزدەرىن ادىلەت دەپارتامەنتىنىڭ قىزمەتكەرلەرى رەتىندە تانىستىرىپ، الداۋ جانە سەندىرۋ جولىمەن ازاماتتارىمىزدىڭ قارجىلارىن سىپىرىپ الادى. ارام پيعىلدى الاياقتار جالعان ءونىمدى ينتەرنەت، الەۋمەتتىك جەلىلەر ارقىلى جوعارى باعامەن ساتۋ سحەماسى ارقىلى جاسايدى. ال، الدانعان تۇرعىندارمەن كەلىسىم جاسالعاننان كەيىن، بارلىق تەلەفونداردى وشىرەدى. ءارى قاراي، الاياقتار جابىرلەنۋشىلەرگە وزدەرىن ادىلەت دەپارتامەنتىنىڭ قىزمەتكەرلەرى رەتىندە تانىستىرىپ، تەلەفون شالادى، الاياقتاردىڭ ۇستالعانى تۋرالى حابارلايدى، جالعان كۋالىكتەر بەرەدى جانە وتەماقى تولەۋگە ۋادە بەرەدى. الايدا الدىن الا كوميسسيا تۇرىندە تولەم تالاپ ەتەدى»، - دەپ ءتۇسىندىردى ءا.جەكسەنوۆ.
ادىلەت دەپارتامەنتىنىڭ ماتەريالدىق-قارجىلاي وتەماقى تولەمەيتىنىن ۆەدومستۆونىڭ باسپا ءسوز حاتشىسى الماس بەكبوتايەۆ حابارلادى.
«وسىعان ۇقساس فاكتىلەر 2022 جىلدىڭ جەلتوقسان ايىنىڭ باسىنان تىركەلە باستاعان. ادىلەت دەپارتامەنتى الماتى قالاسىنىڭ پوليسيا دەپارتامەنتىنە بارلىق دالەلدەيتىن ماتەريالدارمەن ارىز جولدادى، قازىرگى ۋاقىتتا ارىز تەرگەۋ ساتىسىندا تۇر. سوعان قاراماستان، الاياقتار كۇنى بۇگىنگە دەيىن ادامداردى الداپ كەلەدى. ادىلەت دەپارتامەنتىنە كۇن سايىن رەسپۋبليكانىڭ تۇكپىر-تۇكپىرىنەن كەلگەن ازاماتتارىمىزدان الماتى قالاسى ادىلەت دەپارتامەنتىنىڭ قازىرگى قىزمەتكەرلەرى تۋرالى ناقتىلاۋ ءۇشىن قوڭىراۋلار كەلىپ تۇسەدى»، - دەيدى ا.بەكبوتايەۆ.
ۆەدومستۆو وكىلدەرى ەلىمىزدىڭ بارشا تۇرعىندارىن ءوز تۋىستارىن، دوستارى مەن تانىستارىن الاياقتىق فاكتىلەرى تۋرالى ەسكەرتۋگە، الاياقتاردىڭ ارانداتۋشىلىقتارى مەن ۇگىتتەرىنە سەنبەۋگە شاقىردى. وسىنداي جاعدايلار ورىن العان جاعدايدا، +77772522323 تەلەفونىنا حابارلاسىپ، الماتى قالاسى ادىلەت دەپارتامەنتىنىڭ قازىرگى قىزمەتكەرلەرى تۋرالى اقپارات الۋعا بولادى. سونىمەن قاتار، قىزمەتكەرلەردىڭ تىزىمدەرى دەپارتامەنتتىڭ رەسمي سايتىندا جاريالانعان.