الاياقتار ادامداردى الداۋ ءۇشىن AnyDesk جانە TeamViewer باعدارلامالارىن قولدانادى
ءتارتىپ ساقشىلارىنىڭ ايتۋلارىنشا، جەلىدە الاياقتىق جيىلەپ كەتكەن. الاياقتار وزدەرىنىڭ سحەمالارىندا ءۇشىنشى تاراپ قۇرىلعىسىنا قاشىقتان قول جەتكىزۋگە ارنالعان تانىمال جانە زاڭدى باعدارلامالاردى پايدالانادى. ءموبيلدى بانكينگ داعدىلارىن تولىق مەڭگەرمەگەن ازاماتتارعا زيانكەستەر «AnyDesk» جانە «TeamViewer» قوسىمشالارىن جۇكتەۋدى ۇسىنادى، دەپ حابارلايدى Almaty-akshamy.kz
وسىلايشا، ولار ءموبيلدى قۇرىلعىلارعا نەمەسە كومپيۋتەرلەرگە تولىق قول جەتكىزە الادى، بۇل ازاماتتاردان اقشا ۇرلاۋدى جەڭىلدەتەدى.
سونداي-اق، بۇگىنگى تاڭدا ەڭ كوپ تارالعان سحەمالاردىڭ ءبىرى - بانك قىزمەتكەرلەرىنىڭ اتىنان قوڭىراۋ شالۋ. كوبىنە الاياقتار كولل-ورتالىقتىڭ رەسمي ءنومىرىن قايتالاي وتىرىپ، بانك كارتالارىنىڭ قاتىسۋىمەن قانداي دا ءبىر كۇماندى وپەراسيالاردى جۇرگىزۋ سىلتاۋىمەن جاڭىلىستىرۋعا تىرىسادى.
ولار بانك سالاسىنداعى بىلىمدەرىن پايدالانا وتىرىپ، پايداكۇنەمدىك نيەتىنەن ءوز قۇرباندارىن اسقان شەبەرلىكپەن شاتاستىرادى، بۇل كوبىنەسە جەكە مالىمەتتەردى يەلەنۋگە ىقپال ەتەدى. ال اڭعال ازاماتتار الاياقتارعا بانك كارتالارىنىڭ، CVV-كودىنىڭ دەرەكتەمەلەرىن جانە كەلىپ تۇسكەن سمس-پارولدەردى بەرەدى، ناتيجەسىندە اقشالاي قاراجاتتى شوتتاردان وڭاي اۋدارۋعا اكەپ سوعادى.
بانك كارتاسىن ۇستاۋشىلار الاياقتاردىڭ قۇربانىنا اينالماس ءۇشىن، دەرەكتەمەلەر مەن سمس-پارولدەر تۋرالى مالىمەتتەر سۇراپ بانك قىزمەتكەرلەرى اتىنان كەلىپ تۇەتىن كەز كەلگەن قوڭىراۋدى دەرەۋ توقتاتۋ قاجەت.
«ەسىڭىزدە بولسىن، بانك قىزمەتكەرلەرى ەشقاشان مۇنداي مالىمەتتەر سۇرامايدى جانە قوڭىراۋ سوقپايدى. وسىنداي جاعدايلاردا ساق بولۋلارىڭىزدى جانە بارلىق فاكتىلەر تۋرالى پوليسياعا حابارلاۋىڭىزدى سۇرايمىز» - دەپ اتاپ ءوتتى پد كريمينالدىق پوليسيا باسقارماسى ءبولىمىنىڭ باستىعى تالعات بولەگەنوۆ.