ءال-فارابي داڭعىلىنىڭ كولىك جۇرەتىن بولىگىندە ورتاشا جوندەۋ جۇمىستارى مەرزىمىنەن بۇرىن اياقتالدى
اعىمداعى جىلى ورتاشا جوندەۋ جۇمىستارى اياسىندا ۇزىندىعى 9 شاقىرىم اساتىن ءال-فارابي داڭعىلىنىڭ دوستىق داڭعىلىنان اسقاروۆ كوشەسىنە دەيىنگى بولىگىندە ورتاشا جوندەۋ جۇمىستارى جوسپارلانعان بولاتىن.
الدىڭعى ورتاشا جوندەۋ جۇمىستارى بۇل بولىكتە 2010 جىلى جۇرگىزىلگەن. ءنورماتيۆتى جوندەۋارالىق مەرزىمنىڭ وتۋىنە بايلانىستى تەكسەرۋ جۇرگىزىلىپ، ونىڭ بارىسىندا اسفالتبەتون جابىنىندا شۇڭقىرلار، جارىقتار تورى، ۇساقتالۋ تۇرىندەگى اقاۋلار انىقتالدى جانە جولدىڭ اعىمداعى جاعدايى تۋرالى تەحنيكالىق قورىتىندى جاسالدى. تەحنيكالىق قورىتىندى نەگىزىندە ءال-فارابي داڭعىلىن ورتاشا جوندەۋ جوسپارىنا ەنگىزۋ تۋرالى شەشىم قابىلداندى.
وسىلايشا، شىلدە ايىندا ورتاشا جوندەۋ جۇمىستارى باستالىپ، ونى اعىمداعى جىلدىڭ 31 تامىزىنا دەيىن اياقتاۋ جوسپارلانعان بولاتىن. قالا تۇرعىندارىنا ىڭعايلى بولۋ ءۇشىن جۇمىستار تۇندە جۇرگىزىلدى. جوندەۋ بارىسىن جىلدامداتۋ ماقساتىندا جۇمىس بريگادالارىنىڭ جۇمىسى كۇشەيتىلىپ، كولىك جۇرەتىن بولىكتى 16 تامىز كۇنى اياقتاۋعا مۇمكىندىك تۋىندادى.
ايتا كەتەرلىگى، ورتاشا جوندەۋ جۇمىستارى بارىسىندا كولىك جۇرەتىن بولىكپەن بىرگە جاياۋ جۇرگىنشىلەرگە ارنالعان تروتۋار بولىگى دە جوندەلەدى. تروتۋارلاردى جوندەۋ جۇمىستارىن 31 تامىزعا دەيىن اياقتاۋ جوسپارلانىپ وتىر.
قازىرگى تاڭدا داڭعىل بويىندا ەسەنتاي وزەنى ارقىلى وتەتىن كوپىردە جۇمىستار جالعاسىپ جاتىر. رەكونسترۋكسيا اياقتالعاننان كەيىن كولىك جۇرەتىن بولىكتە پوليمەرلى اسفالتبەتون جابىنىنىڭ جوعارعى قاباتى توسلەتىن بولادى. جول جۇمىستارىنىڭ باستالۋى تۋرالى قوسىمشا حابارلاناتىن بولادى.
ەسكە سالا كەتەيىك، بيىلعى جول جوندەۋ ماۋسىمىندا قالادا العاش رەت پوليمەرلى اسفالتبەتون جابىنى قولدانىلۋدا. جول قۇرىلىسىندا پوليمەر قوسپاسىن پايدالانۋ جابىن ساپاسى مەن توزىمدىلىگىن ارتتىرىپ، بيتۋمنىڭ جۋىلىپ كەتۋىنىڭ الدىن الادى. سونىمەن قاتار، پوليمەر جول جابىنىنىڭ پايدالانۋ ۇزاقتىعىن ارتتىرىپ، بەرىكتىگى مەن ايازعا توزىمدىلىگىن قامتاماسىز ەتەدى.
جالپى، قالا اكىمدىگى بيىل 200 شاقىرىمنان اساتىن 230 كوشەنى ورتاشا جوندەۋمەن قامتۋدى جوسپارلاپ وتىر. قالا بويىنشا 3097 شاقىرىمدى قۇرايتىن 2746 كوشە بار. جاقسى جانە قاناعاتتانارلىق جاعدايداعى جولداردىڭ ۇلەسىن بيىل 86%-دان 89%-عا، ال 2025 جىلعا دەيىن 95%-عا جەتكىزۋ جوسپارلانعان، اتالعان ماقساتتا جىل سايىن كەمىندە 200 شاقىرىم جول جوندەلىپ وتىرۋى قاجەت. وسىلايشا، كورسەتىلگەن جۇمىس كولەمى جول ينفراقۇرىلىمىن جاقسارتۋ جوسپارلارىنا سايكەس كەلەدى.
كەشە
بۇگىن
