باس پروكۋروردىڭ ورىنباسارى ۇلان بايجانوۆ ەلدەن زاڭسىز شىعارىلعان اكتيۆتەردى قايتارۋ ماسەلەسىمەن اينالىساتىن ارناۋلى ۆەدومستۆونىڭ شتاتى قالاي قۇرىلاتىنىن ءتۇسىندىردى، دەپ حابارلايدى Almaty-akshamy.kz.
ول بۇل ورگاننىڭ تەزىرەك قۇرىلۋىنا مۇددەلى ەكەنىن ايتتى. ءبىراق، بۇل جەردە وسى ۆەدومستۆو جۇمىسىنىڭ ەرەكشەلىگىن ەسكەرۋ قاجەت.
«ءبىز مورالدىق-ەتيكالىق نورمالار تۇرعىسىنان دا، دايىندىق ساپاسى مەن قۇزىرەتى جاعىنان دا لايىق مامانداردى تاڭداۋىمىز كەرەك. وسى زاڭنىڭ («زاڭسىز يەمدەلگەن اكتيۆتەردى مەملەكەتكە قايتارۋ تۋرالى») وربيتاسىنا تارتىلاتىن سۋبەكتىلەر حالىقارالىق كونسالتينگتىك، اۋديتورلىق، زاڭگەرلىك كومپانيالاردى جالداۋعا مۇمكىندىگى بار اۋقاتتى ادامدار ەكەنىن ءتۇسىنۋىمىز كەرەك. ولار وتە جاقسى قورعالعان. بۇل تۇرعىدا ءبىزدىڭ جاقتان دا وسىنداي جوعارى دەڭگەيدەگى ماماندار بولۋى كەرەك. سوندىقتان، جۇمىسقا قابىلداۋ ماسەلەسىنە ەرەكشە كوڭىل بولىنەدى. وسى ورايدا، جۇمىسقا الىناتىن قىزمەتكەرلەرگە قاتىستى قويىلاتىن ءتيىستى تالاپتاردى ازىرلەۋگە كىرىسىپ جاتىرمىز»، - دەدى ۇ. بايجانوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، شتات 130-عا جۋىق ادامنان قۇرالۋى مۇمكىن. ونىڭ باسىم بولىگى نەمەسە جارتىسى اۋقىمدى دەرەكتەرمەن جۇمىس ىستەيتىن ءارى دەرەكتەرگە تالداۋ جۇرگىزەتىن اقپاراتتىق ساراپتاما ورتالىعىندا قىزمەت ەتەدى.
«ءتيىستى انىقتامالىق جۇمىستاردى قامتىپ، ساراپشىلار مەن مامانداردى جۇمىلدىرامىز. وزىمىزگە پايدالى بولۋى مۇمكىن بارلىق دەرەككوزدى كوتەرىپ، وندا كەرەك مالىمەتتەردى زەرتتەيمىز»، - دەدى باس پروكۋروردىڭ ورىنباسارى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا پالاتا دەپۋتاتتارى «زاڭسىز يەمدەلگەن اكتيۆتەردى مەملەكەتكە قايتارۋ تۋرالى» زاڭدى ماقۇلدادى. زاڭدا اكتيۆتەردى قايتارۋدىڭ ەرىكتى نەمەسە ءماجبۇرلى ءتارتىبى كوزدەلگەن.
زاڭنىڭ نەگىزگى ماقساتى – قازاقستان رەسپۋبليكاسىنىڭ اۋماعىندا دا، ودان تىس جەرلەردە دە زاڭسىز يەمدەلگەن اكتيۆتەردى قايتارۋ ءۇشىن زاڭنامالىق پارامەترلەردى ايقىنداۋ، سونداي-اق ولاردى زاڭسىز يەمدەنۋگە جانە شىعارۋعا ىقپال ەتكەن جاعدايلاردى جويۋ.
باس پروكۋراتۋرانىڭ قۇرىلىمىندا زاڭسىز شىعارىلعان اكتيۆتەردى قايتارۋ جونىندەگى جەكە ۆەدومستۆو قۇرىلادى. ول وسى سالاداعى ۋاكىلەتتى ورگاننىڭ فۋنكسيالارىن ورىندايدى.