الماتىدا ۇلتتىق ۇلاننىڭ اسكەري قىزمەتشىلەرى ەلىمىزدىڭ تانىمال اكتەرلەرى مۇرات بەيسەنبين جانە مارات ابدۋللايەۆپەن كەزدەستى. بۇل مادەني ءىس-شاراعا مەگاپوليسكە ىسساپارمەن كەلگەن ق ر ۇلتتىق ۇلانى باس قولباسشىسىنىڭ ورىنباسارى، حالىق قاھارمانى گەنەرال-مايور قايرات ۇمبەتوۆ تە قاتىستى.
اسكەردىڭ وڭ بەينەسىن قالىپتاستىرىپ، اسكەري قىزمەتتىڭ ابىرويىن ارتتىرا تۇسۋگە، كەيىنگى بۋىن جاستاردى وتاندى ءسۇيۋ، قادىرلەۋ، ونى قورعاۋ ءۇشىن دايىن بولۋعا تاربيەلەۋدە ونەر سالاسىنىڭ دا ىقپالى زور ەكەنى ءسوزسىز. وعان كەيىنگى بىرنەشە جىل قاتارىنان ۇلتتىق ۇلاننىڭ قىزمەتى مەن ەرجۇرەك باتىرلارىنا ارنالعان فيلمدەردىڭ ءتۇسىرىلۋى، ۇلتتىق ۇلان ءان-بي ءانسامبلىنىڭ ەلىمىزدىڭ ءار وبلىسىنا گاسترولدىك ساپارمەن شىعۋى، اقپارتتىق-ناسيحات جۇمىستارىنىڭ بەلسەندى جۇرگىزىلىپ تۇراتىندىعى، ساربازدارمەن كەزدەسۋگە اقىن-جازۋشىلار، سپورتتاعى چەمپيوندار، ءار سالاداعى ونەر ادامدارىنىڭ كەلىپ تۇرۋى دالەل بولا الادى.
بۇگىن دە وسىنداي جارقىن جۇزدەسۋ بولىپ، اسكەري قىزمەتشىلەر مەن ونەر ادامدارىنىڭ اراسىندا سۇبەلى سۇحبات بولدى. كەزدەسۋگە كەلگەن مۇرات بيسەنبين قازاقستان عانا ەمەس، الىس-جاقىن شەتەلدەرمەن بىرلەسىپ تۇسىرىلگەن وننان استام كينوكارتينادا ويناعان. ونىڭ تانىمالدىلىعى «رەكەتير» فيلمىنە تۇسكەن سوڭ، ارتا باستاعان. بۇدان بولەك، اكتەر «ماحامبەتتىڭ قىلىشى»، «گۇلستان»، «اركىم گولگوفقا شىعا الادى» حيكاياسىندا جانە تاعى باسقا كوپتەگەن فيلمدە ويناعان.
ال اكتەر مارات ابدۋللايەۆ «زاحار بۇركىت»، «تاراز»، «قازاق حاندىعى»، «باۋىرجان مومىش ۇلى» تۋىندىلارىندا شەبەر ويىنىمەن تانىلعان. ەكرانداعى ەر تۇلعاسىمەن كورەرمەندى ءتانتى ەتىپ جۇرگەن اكتەرلەرمەن جۇزبە-جۇز كەزدەسۋ اسكەري قىزمەتشىلەر ءۇشىن ەرەكشە جاعداي بولدى.
ق ر ۇلتتىق ۇلانى باس قولباسشىسىنىڭ ورىنباسارى گەنەرال-مايور قايرات ۇمبەتوۆ ونەر ادامدارىنىڭ جاستارعا اسكەري-پاتريوتتىق تاربيە بەرۋ ىسىنە قوسىپ جاتقان ۇلەستەرىنە العىس ءبىلدىرىپ، مۇرات بيسەنبين مەن مارات ابدۋللايەۆتىڭ كەۋدەسىنە «ۇلتتىق ۇلان قىزمەتىنىڭ ۇزدىگى» توسبەلگىسىن تاقتى.