كاسىپكەرلىك سالاسىنىڭ وكىلدەرى دە سىيلىقتان قۇر قالمادى
ەلورداداعى Rixos President Astana قوناقۇيىندە ءداستۇرلى «حالىقتىڭ سۇيىكتىسى» ۇلتتىق سىيلىعىنىڭ لاۋرەاتتارىن ماراپاتتاۋ ءراسىمى ءوتتى، دەپ حابارلايدى Almaty-akshamy.kz turkystan.kz-كە سىلتەمە جاساپ.
2011 جىلدان بەرى وتكىزىلىپ كەلە جاتقان بايقاۋدا بۇل جولى اتاقتى اكتەر، ق ر حالىق ءارتىسى نۇرجۇمان ىقتىمبايەۆ قازاقستاننىڭ دامۋىنا ۇلكەن ۇلەس قوسقان اعا بۋىن وكىلدەرىنە بەرىلەتىن «التىن ءداۋىر» اتالىمىنىڭ جەڭىمپازى اتاندى. كەڭەس وداعىنىڭ بارلىق دەرلىك كينوستۋديالارىندا ويناپ، ميلليونداعان تەلەكورەرمەننىڭ سۇيىكتى اكتەرى نۇرجۇمان بايجۇمان ۇلى بىلتىر 80 جاسقا تولدى. شارا ۇيىمداستىرۋشىلارى مەن قازىلار القاسى اكتەردىڭ مەرەيتويىنا وراي بەدەلدى سىيلىقتى تابىستاۋ تۋرالى شەشىم قابىلداعان.
ايتا كەتسەك، بۇعان دەيىن «التىن ءداۋىر» اتالىمى قازاقستاننىڭ دامۋىنا ۇلكەن ۇلەس قوسقان بەلگىلى قازاقستاندىقتار – يۋريي پومەرانسيەۆ، لاكي كەسوگلۋ، مىرزاتاي جولداسبەكوۆ، يراك ەلەكەيەۆ، ءشومىشباي سارييەۆ جانە باسقا دا كوپتەگەن ازاماتتارعا تابىستالعان بولاتىن.
كاسىپكەرلىك سالاسىنىڭ وكىلدەرى دە سىيلىقتان قۇر قالمادى. ەل ەكونوميكاسىنىڭ دامۋىنا ەلەۋلى ۇلەس قوسقان بيزنەسمەندەردىڭ ىشىنەن تانىمال كاسىپكەر، قوعام قايراتكەرى، «يمستالكون-تەمىرتاۋ» ج ش س باسشىسى يۆان گەورگاديعا «جىل بيزنەسمەنى» اتالىمى بۇيىردى. سونداي-اق، سولتۇستىك قازاقستان وبلىسىنداعى «سەمەينىي» سۋپەرماركەتتەر جەلىسى جانە ونىڭ باسشىسى اندرەي يسااكوۆتىڭ سولتۇستىك ءوڭىردىڭ ەكونوميكاسىنا قوسقان ۇلەسى ەسكەرىلدى. كوپتەگەن الەۋمەتتىك جوبالارعا باستاماشى بولعان كاسىپكەردىڭ سۋپەرماركەتتەر جەلىسى «جىلدىڭ ۇزدىك الەۋمەتتىك بيزنەسى» اتالىمىندا توپ جاردى.
Azattyq Rýhy اگەنتتىگى ەكىنشى جىل قاتارىنان «حالىقتىڭ سۇيىكتىسى» سىيلىعىنىڭ جەڭىمپازى اتاندى.
1994 جىلى تاجىك-اۋعان شەكاراسىندا باندالىق قۇرىلىمدارمەن بولعان قاقتىعىستا ەرلىكپەن قازا تاپقان قازاقستاندىق رادجان باتىرقانوۆ «ەرجۇرەك جۇرەك» اتالىمىنا لايىق دەپ تانىلدى. تۇركىمەنستان مەن تاجىكستان پرەزيدەنتتەرى رادجان باتىرقانوۆتى ءوز ەلدەرىنىڭ جوعارى ناگرادالارىمەن ماراپاتتاعان بولاتىن. «حالىقتىڭ سۇيىكتىسى» ماراپاتى باتىردىڭ اناسى قيزات باتىرقانوۆاعا تابىستالدى.
سونىمەن قاتار، وتاندىق سپورت جۇلدىزى، بىلتىرعى پاراليمپيادا ويىندارىنىڭ چەمپيونى داۆيد دەگتياريەۆ «جىلدىڭ ۇزدىك سپورتشىسى» اتالىمىندا الدىنا جان سالمادى. ال «جىلدىڭ ۇزدىك دارىگەرى» اتالىمىندا تانىمال قازاقستاندىق حيرۋرگ يۋريي پيا جەڭىسكە جەتتى.