كوندراتوۆيچ پەن ەرجانوۆ كوشەسىنىڭ قيىلىسى ادام تانىماستاي وزگەرگەن
ايتىلعان ءسوز، بەرىلگەن ۋادە. الماتى اكىمى تۇركسىب اۋدانى تۇرعىندارىمەن كەزدەسۋىنەن كەيىن وڭ وزگەرىستەردىڭ ورىن العانىن ايتىپ، العىس ءبىلدىردى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تۇركسىب اۋدانىندا تۇراتىن لادا كولچۋگينا الماتى اكىمى ەربولات دوسايەۆپەن كەزدەسۋگە بارعان. ونىڭ ايتۋىنشا، زاكارپاتسكايا كوشەسى ارقىلى ايالداماعا جەتۋ، وقۋشىلاردى مەكتەپكە تاسۋ حالىق ءۇشىن مۇڭ بولعان. اسىرەسە، اربا سۇيرەگەن انالار قينالادى. كولىك تىزگىندەگىلەر تەمىر تۇلپارلارىن تۋرا كوشە بويىنا قويىپ كەتەتىن ەدى. ەندى مىنە بەرىلگەن ۋادە ورىندالىپ، جۇرگىنشىلەر جولى سالىندى. ونىڭ ەنى كەڭەيتىلىپ، كولىككە ەمەس، حالىققا ارنالعان اۋماق ارتتى.
«حالىق ۇنىنە قۇلاق اساتىن مەملەكەت» دەگەن تۇجىرىمدامانىڭ شىن مانىندە جۇمىس ىستەيتىنە قۋانىشتىمىن. ايتقان ۇسىنىسىمىز جەردە قالمادى. العىسىم شەكسىز. ءقازىر جۇرگىزۋشىلەر كولىگىن بىزگە كەدەرگى كەلتىرمەيتىندەي ەتىپ قويادى. حالىققا ءجۇرۋ ءقاۋىپسىز بولدى. جول اناعۇرلىم كەڭەيدى. بۇرىن بۇل جەرمەن جۇرگەندە جانىمىزدى شۇبەرەككە ءتۇيىپ جۇرەتىنبىز»، – دەدى قالا تۇرعىنى لادا كولچۋگينا.
ال كوندراتوۆيچ پەن ەرجانوۆ كوشەسىنىڭ قيىلىسى ادام تانىماستاي وزگەرگەن. «باسقاراسۋ» وزەنىنىڭ ماڭى بىرنەشە اي بۇرىن قاراۋسىز قالعان جەر ەدى. حالىقتىڭ سۇراۋى «حالىق قاتىساتىن بيۋدجەت» جوباسى اياسىندا ىسكە استى. ەكى كوشەنى جالعايتىن كوپىر سالىنىپ، حالىققا دەمالىس اۋماعى جاسالىندى. وعان قوسا، فۋتبول جانە زاماناۋي ويىن الاڭى دا بار.
«ەرجانوۆ پەن كوندراتوۆيچ كوشەسىنىڭ اراسىن جالعايتىن كوپىر قۇراستىرىلدى. بۇل جەردە ۇلكەن كىسىلەر جانە دە جاس بالالار، جاسوپسىرىمدەر مەكتەپكە باراتىن بولادى. ەڭ العاش تۇرعىنداردىڭ سۇرانىسى ەكى ورتادا بالالاردىڭ جۇرۋىنە قولايسىز بولعاندىقتان، ۋاقىتشا جاياۋ جۇرگىنشىلەر جولىن سالۋ ۇسىنىلعان بولاتىن. ال ءبىز تولىقتاي قامتۋدى شەشتىك»، – دەدى تۇركسىب اۋداندىق كورىكتەندىرۋ ءبولىمىنىڭ باسشىسى ساكەن باياسىل.
كەزدەسۋدەگى كورىكتىندىرۋگە قاتىستى 20 شاقتى تۇرعىننىڭ سۇراق قويدى. ولار ءقازىر شەشىلىپ جاتىر.