مۇنداي سايلاۋ بۇرىن-سوڭدى ەلىمىزدىڭ تاريحىندا بولماعان.
بۇگىن، 25 شىلدەدە، اۋداندىق ماڭىزى بار قالالاردىڭ، اۋىلداردىڭ، كەنتتەردىڭ، اۋىلدىق وكرۋگتەردىڭ اكىمدەرىنىڭ تىكەلەي سايلاۋى ءوتىپ جاتىر، دەپ حابارلايدى Almaty-akshamy.kz
سايلاۋ 14 وبلىستاعى 1847 سايلاۋ ۋچاسكەسىندە وتۋدە. اۋماقتىق سايلاۋ كوميسسيالارىنىڭ مالىمەتتەرى بويىنشا، 730 سايلاۋ وكرۋگىندە 2 582 كانديدات ۇسىنىلعان. ولاردىڭ ىشىندە 2 297 ۇمىتكەر تىركەۋدىڭ سوڭعى ساتىندە تىركەلگەن.
ۇمىتكەرلەر قۇرامىندا: 1419 – ءوزىن-وزى ۇسىنۋ جولىمەن، 878 – ق ر ءام تىركەلگەن 6 ساياسي پارتيادان قاتىسادى. گەندەرلىك قۇرام بويىنشا: ەرلەر – 1839، ايەلدەر – 458.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ 2020 جىلعى 1 قىركۇيەكتەگى «قازاقستان جاڭا ناقتى احۋالدا: ءىس-قيمىل ۋاقىتى» اتتى ەل حالقىنا جولداۋىندا 2021 جىلدان باستاپ اۋىل اكىمدەرىنىڭ تىكەلەي سايلاۋىن وتكىزۋ تۋرالى تاپسىرما بەرگەن بولاتىن.
بۇل باستاما جەرگىلىكتى ءوزىن-وزى باسقارۋ ينستيتۋتتارىنىڭ جاپپاي پراكتيكاسىن ەنگىزۋ ارقىلى مەملەكەتتىك باسقارۋدى ورتالىقسىزداندىرۋعا قاتىستى نەگىزگى ساياسي رەفورمالار پاكەتىن دايەكتى ىسكە اسىرۋعا باعىتتالعان.
جەرگىلىكتى باسقارۋ مەن ءوزىن-وزى باسقارۋدى رەفورمالاۋ ءبىرقاتار ستراتەگيالىق مىندەتتەردى شەشۋگە باعىتتالعان.
بىرىنشىدەن، جەرگىلىكتى ءوزىن-وزى باسقارۋ ورگاندارىن سايلاۋدى اشىق مەملەكەتتىك باسقارۋ قاعيداتى جانە «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ نەگىزىندە ەنگىزۋ.
ەكىنشىدەن، ازاماتتاردىڭ اۋىلدىق اۋماقتاردى دامىتۋعا جانە جەرگىلىكتى ماڭىزى بار ماسەلەلەردى شەشۋگە قاتىسۋىن كەڭەيتۋ.
ۇشىنشىدەن، اتقارۋشىلىق جانە زاڭنامالىق وكىلەتتىلىكتەردى تومەنگى دەڭگەيگە كەزەڭ-كەزەڭىمەن بەرۋ.
تورتىنشىدەن، اۋىل اكىمدەرىن تىكەلەي سايلاۋ كەزىندە پارتيالاردىڭ وكىلەتتىلىكتەرىن كەڭەيتۋ ارقىلى ساياسي باسەكەلەستىكتى دامىتۋ.