پرەزيدەنت مەملەكەتتىك قىزمەت ىستەرى اگەنتتىگىمەن بىرلەسىپ، «اكىمدەر مەكتەبى» وقىتۋ جوباسىن ىسكە قوسۋدى تاپسىردى.
قازاقستاننىڭ اكىمدەرى قايتادان مەكتەپتە وقيدى، دەپ حابارلايدى aqshamnews.kz
توقايەۆ ۇكىمەتتىڭ كەڭەيتىلگەن وتىرىسىندا اكىمدەردى تىكەلەي سايلاۋدىڭ ناتيجەسىندە مەملەكەتتىك قىزمەتشىلەردىڭ جاڭا ساناتى – سايلاناتىن باسشىلار پايدا بولعانىن ايتادى. ونىڭ سوزىنشە، بۇل – ەكى جارىم مىڭنان استام باسشى لاۋازىمىنداعى قىزمەتكەر دەگەن ءسوز. ولاردىڭ اراسىندا بۇرىن مەملەكەتتىك قىزمەتتە جۇمىس ىستەمەگەن ازاماتتار، سونىڭ ىشىندە جاستار كوپ.
سول سەبەپتى سايلانعان اكىمدەر مەن ءتۇرلى دەڭگەيدەگى باسشىلاردى كەشەندى دايىندىقتان وتكىزۋ ماسەلەسى وتە وزەكتى بولىپ تۇر. ۇكىمەتكە مەملەكەتتىك قىزمەت ىستەرى اگەنتتىگىمەن بىرلەسىپ، «اكىمدەر مەكتەبى» وقىتۋ جوباسىن ىسكە قوسۋدى تاپسىرامىن. بۇل رەتتە وسىنداي جۇمىستى جۇرگىزىپ جاتقان «اmanat» پارتياسىنىڭ تاجىريبەسىن ەسكەرگەن ءجون، – دەيدى ول.
پرەزيدەنت مەملەكەتتىك اپپاراتتىڭ باستى مىندەتى – ازاماتتاردى تولعاندىراتىن وزەكتى ماسەلەلەردى شەشۋ ەكەنىن ايتادى.
ول ءۇشىن، ەڭ الدىمەن، ازاماتتارمەن ۇدايى بايلانىستا بولۋ كەرەك. ونسىز بولمايدى. سوندىقتان حالىقتان كەلىپ تۇسەتىن وتىنىشتەرگە ايرىقشا نازار اۋدارۋ قاجەت. بىلتىردىڭ وزىندە پرەزيدەنت اكىمشىلىگىنە 50 مىڭنان استام ءوتىنىش كەلىپ تۇسكەن، ال ەلىمىزدەگى بارلىق مەملەكەتتىك ورگاندارعا شامامەن 4 ميلليون ءوتىنىش جولدانعان. بۇل كورسەتكىش جىلدان جىلعا كوبەيۋدە، – دەدى مەملەكەت باسشىسى.
توقايەۆتىڭ سوزىنشە، بۇل ءبىر جاعىنان جۇرتتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا سەنەتىنىن كورسەتەدى. الايدا، سونىمەن بىرگە، بۇل ولاردىڭ وتىنىشتەرى مەن ماسەلەلەرى مەملەكەتتىك ورگانداردىڭ كۇندەلىكتى جۇمىسى بارىسىندا شەشىمىن تاپپاي جاتقانىن اڭعارتادى. “سوندىقتان ولقىلىقتار مەن كەمشىلىكتەردى جويۋ ءۇشىن تياناقتى جۇمىس جۇرگىزۋ قاجەت. ادەتتە ازاماتتاردىڭ وتىنىشتەرىنىڭ ارتىندا ادام تاعدىرى تۇرادى، سوندىقتان، بۇل جەردە بارلىق قۇزىرلى ورگاندار جۇمىلا جۇمىس ىستەۋگە ءتيىس” دەيدى ول.