استانادا ەرلىكپەن قازا تاپقان ءورت ءسوندىءرۋشى اسقار زابيكۋلين تۋرالى «قاھارمان» سەريالى ءتۇسىرىلىپ جاتىر. بۇل تۋرالى ونىڭ جەسىرى انەل زابيكۋلينا ءوزىنىڭ Instagram پاراقشاسىندا حابارلادى.
«ءتۇسىرۋ توبى استاناعا كەلىپ، بىردەن جۇمىسقا كىرىستى. ارينە، بۇكىل پروسەستى ءوز كوزىمىزبەن كورۋ مۇمكىندىگىن جىبەرىپ المادىق. ايتا كەتەيىن، كينو ءتۇسىرۋ وڭاي ەمەس. ءبىز ول جەردە 5 ساعاتتاي بولدىق. تۇسىرىلىمگە دايىندىق، بىرنەشە دۋبل، راكۋرس، جارىق. بۇل – ءبىر عانا كورىنىستى ءتۇسىرۋ كەزىندە كورگەن قيىندىقتىڭ كىشكەنە عانا بولىگى. بارلىق ءتۇسىرىلىم توبىنا قاجىرلى ەڭبەگى ءۇشىن راحمەت. سەريال بارلىعىنا ۇنايدى دەپ سەنەمىن»، – دەپ جازدى انەل زابيكۋلينا.
ايتا كەتەيىك، بىلتىر قاراشادا ەلوردادا 15 قاباتتى ءۇيدەن ءورت شىعىپ، سالدارىنان 3 ادام، ونىڭ ىشىندە ءبىر بالا اۋرۋحاناعا تۇسكەن بولاتىن. بىرنەشە ادامدى قۇتقارعان ءورت ءسوندىرۋشى اسقار زابيكۋليننىڭ دەنەسىنىڭ 80%-ىن كۇيىك شالىپ، جانساقتاۋ بولىمىنە جاتقىزىلادى. وكىنىشكە قاراي، ءبىرنەشە كۇننەن سوڭ كوز جۇمدى.
مارقۇمنىڭ جارى پاراقشاسىنا تاعى ءبىر اسەرلى فوتو جاريالادى. وندا كىشكەنتاي قىزى سەريالدىڭ باستى كەيىپكەرى – اكەسىنىڭ ءرولىن سومداپ جاتقان اكتەردى قۇشاقتاپ تۇر. «كينوداعى اكەسىن قۇشاقتاپ تۇرعان قىزىمنىڭ كىشكەنتاي عانا جۇرەگىن مەن جاقسى تۇسىنەمىن، ءورت ءسوندىرۋشى فورماسىنداعى ەر ادامداردان اكەسىن كورەتىندەي... اراسىنان اكەسى شىعا كەلەتىندەي...» دەپ جازدى سۋرەت استىنا.
ءورت ءسوندىرۋشى اسقار زابيكۋلين I دارەجەلى «ايبىن» وردەنىمەن ماراپاتتالدى. 20 جەلتوقساندا وعان «التىن ادام» سىيلىعى تابىس ەتىلدى. ەسىمى ەلوردانىڭ جاڭا كوشەلەرىنىڭ بىرىنە بەرىلدى.