«Almaty Theatre» ساحناسىندا مۇحتار اۋەزوۆ اتىنداعى قازاق ۇلتتىق دراما تەاترىنىڭ 99-ماۋسىمى رەسمي تۇردە اشىلدى. اشىلۋ قويىلىمى رەتىندە عابيت مۇسىرەپوۆتىڭ «قوزى كورپەش – بايان سۇلۋ» سپەكتاكلى كورسەتىلدى.
ماۋسىماشار باسپا ءسوز ءماسليحاتىندا تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەركىن جۋاسبەك تەاتر عيماراتىنىڭ ەكى جىلعا جوندەۋگە جابىلاتىنىن اتاپ ءوتتى.
جوندەۋ جۇمىستارى 2026 جىلى اياقتالماق. سول سەبەپتى تەاتر ۇجىمى گاسترولدىك ساپارلار اياسىندا تالعار، ەسىك، قاسكەلەڭ، ۇزىناعاش، قونايەۆ قالالارىندا ونەر كورسەتۋدى جالعاستىرادى.
بۇدان بولەك، بيىل اقتوبە، قوستاناي جانە قىرعىزستاننىڭ بىشكەك قالاسىندا دا سپەكتاكلدەر قويۋ جوسپارلانىپ وتىر. جوندەۋ جۇمىستارى كەزىندە جاڭا قويىلىمدار دايىندالمايدى، سەبەبى دەكوراسيا مەن كيىم تىگۋ سەحتارى تەاتر عيماراتىندا قالعان.
قازاقستاننىڭ ەڭبەك ەرى، كسرو جانە قازاقستاننىڭ حالىق ءارتيسى، تەاتردىڭ كوركەمدىك جەتەكشىسى ءاسانالى ءاشىموۆ تەاتر ۇجىمىنا ساتتىلىك تىلەپ، تەاتردىڭ ءداستۇرىن جاستاردىڭ جالعاستىرۋى كەرەكتىگىن اتاپ ءوتتى. سونىمەن قاتار، سالتاناتتى ءىس-شارا بارىسىندا قازاقستاننىڭ ەڭبەك سىڭىرگەن قايراتكەرى، قويۋشى رەجيسسەر الىمبەك ورازبەكوۆتىڭ كىتابىنىڭ تۇساۋكەسەرى ءوتتى.
تەاتر ۇجىمى الداعى ەكى جىلدا رەپەرتۋارىنداعى 70 سپەكتاكلدى كورەرمەنگە كورسەتۋدى جوسپارلاپ وتىر.