وتان – وتباسىنان باستالادى. وتباسى قۇندىلىعى – قاي زاماندا دا، قاي ەلدە دە مەملەكەت ساياساتىنىڭ تەمىرقازىعى، ارداق تۇتار قازىناسى. ال وتاننىڭ قاۋىپسىزدىگى ەل ىرگەسىن ساقتاپ، قورعاپ جۇرگەن اسكەري قىزمەتشىلەرگە تىكەلەي بايلانىستى.
بۇگىنگى كەيىپەرىمىز قازاقستان رەسپۋبليكاسىنىڭ ۇلتتىق ۇلانىندا قىزمەت ەتىپ جۇرگەن كينولوگ-مامان كىشى سەرجانت ءتۇرسىنالى راۋان قايرات ۇلى جايلى بولماق.
راۋان ءتۇرسىنالى الماتى وبلىسى، كەگەن اۋدانى، نارىنقول اۋىلىنىڭ تۋماسى. بۇگىندە جەتىسۋ وبلىسى، تالدىقورعان قالاسىندا ورنالاسقان 5514 اسكەري بولىمىندە قىزمەت ەتەدى. وتان الدىنداعى بورىشىن وتەي سالىسىمەن، 2015 جىلى كەلىسىمشارت بويىنشا اتالعان اسكەري قۇرىلىمعا قىزمەتكە ورنالاساقان. سودان بەرى ۇلتتىڭ مۇددەسى ءۇشىن ەڭبەك ەتىپ وتاندى دا، وتباسىن دا ساقتاپ كەلەدى.
– العاشقى ساۋالىمىزدى وتباسىڭىزدان باستاساق. اتا-اناڭىز، باۋىرلارىڭىز تۋرالى ايتىپ وتسەڭىز؟ ولاردىڭ قانداي قاسيەتىن بويىڭىزعا ءسىڭىردىڭىز!
– ءبىز اسكەري تارتىپپەن وسكەنبىز. ويتكەنى، اكەم دە، انام دا اسكەري سالادا وسى مەن قىزمەت ەتىپ جاتقان ۇلتتىق ۇلاننىڭ 5514 اسكەري بولىمىندە قىزمەت اتقارعان جاندار. ءقازىر ەكەۋى دە قۇرمەتتى ەڭبەك دەمالىسىندا. انام مەۋرەرت تىكەنبايەۆا ءبولىمنىڭ مەديسينا پۋنكتىندە سانيتارلىق نۇسقاۋشى قىزمەتىندە، اكەم قايرات تۇرىسبەكوۆ پاتەر-پايدالانۋ قىزمەتىنىڭ باستىعى لاۋازىمىندا بولعان. ءبىزدىڭ ۇيدە دە اسكەري ءتارتىپ، تازالىق. ءۇش اعايىندىمىز. وزىمنەن كەيىن قارىنداسىم جانە ءىنىم بار. «اربانىڭ الدىڭعى دوڭگەلەگى قايدا جۇرسە، ارتقىسى دا سوندا جۇرەدى» دەمەكشى، ارتىمنان ەرگەن باۋىرىم دا بيىل كوللەدجىن اياقتاپ، ەر ازاماتتىڭ پارىزى سانالاتىن وتان الدىنداعى بورىشىن وتەۋگە نيەتتى.
بۇل ومىردەگى ادامعا قويىلاتىن ەڭ باستى تالاپتىڭ ءبىرى – ادامي اسىل قاسيەتتەردى بويىڭا ءسىڭىرۋ. مەن اتا-انامنىڭ ىزگىلىك، كىشىپەيىلدىلىك، مەيىرىمدىلىك، ادامگەرشىلىك سەكىلدى قاسيەتتەرىن سىڭىرە ءبىلدىم. سول كىسىلەردىڭ ارقاسىندا قاناتىم قاتايدى، وتانعا دەگەن سۇيىسپەنشىلىگىم ارتتى. جالپى، ومىردە ادامداردىڭ يماندىلىعىن، ۇقىپتىلىعىن باعالايمىن. ساتقىندىقتى ۇناتپايمىن، ونداي ادامدار جولىقپاسا ەكەن دەيمىن.
– اسكەري سالاعا قالاي، قاشان كەلدىڭىز؟ بۇل سالانى تاڭداعانىڭىزعا وكىنبەيسىز بە؟
– اسكەر قاتارىنا 2013 جىلى شاقىرىلىپ، مەرزىمدىك قىزمەت ساربازى اتالعان كۇنى 19 جاسقا تولدىم. وتان الدىنداعى قىزمەتىمدى تارازداعى شەكارا قىزمەتىنىڭ 2035 اسكەري بولىمىندە وتەدىم. وندا كينولوگ قىزمەتىندە بولدىم. اسكەر قاتارىنداعى قىزمەتىمدى بولاشاق ومىرىمەن بايلانىستىرىپ، 2015 جىلدىڭ جەلتوقسانىندا قۇقىقتىق ءتارتىپ اسكەرىنىڭ 5514 اسكەري بولىمىنە تىل قىزمەتىندە ءىس جۇرگىزۋشى مامانى بولىپ كەلىسىمشارت بويىنشا قىزمەتكە ورنالاستىم. كەيىن اراعا ءبىر جىل سالىپ 2016 جىلى قاراكەمەردەگى وقۋ ورتالىعىنان ءبىلىم الىپ كەلگەننەن كەيىن، كينولوگيا قىزمەتىنە اۋىستىم. بۇگىندە قاراماعىمدا التى اسكەري قىزمەتشىسى بار كينولوگيا توبىن باسقارىپ وتىرمىن. وسى جولدى تاڭداعانىما ەشقاشان وكىنبەيمىن. ال وعان مەنىڭ اتا-انام ءارقاشان سەنىممەن قاراپ، دەمەپ وتىرادى.
– قىزمەتتىك ءيتىڭىز تۋرالى كەڭىرەك اڭگىمەلەپ بەرىڭىز. قانشا ءيتىڭىز بولدى؟ يتتەردى قالاي باپتايسىز؟ قانداي تاسىلدەرمەن جاتتىقتىراسىز؟ 
– توعىز جىلدىق قىزمەتىمدە ءوزىم جەكە ۇيرەتكەن ءتورت ءيتىم بولدى. قازىرگى قىزمەت ەتىپ جۇرگەن ءيتىمنىڭ اتى «پۋليا». ول بەلگيالىق وۆچاركالاردىڭ مالينۋا دەگەن تۇرىنە جاتادى. كينولوگ بولۋ – وتە قىزىق كاسىپ. قىزمەت ۋاقىتىمدا وزىمە بەكىتىلگەن ءيتىمدى جاتتىقتىرامىن، سەرۋەندەتەمىن، كۇتىپ-باپتايمىن، تۇرعان ورنىن تازالاپ، ونىڭ دۇرىس تاماقتانۋىنا كوڭىل بولەمىن. پاترۋلدەۋ-ىزدەستىرۋ قىزمەتىن اتقاراتىن «پۋليا» جەكە قۇراممەن بىرگە قالانىڭ تىنىشتىعىن ساقتاۋ ءۇشىن قىزمەتكە كۇندەلىكتى شىعىپ ءجۇر. جارتى جىلعا جۋىق ۋاقىت قىزمەت ەتىپ كەلە جاتقان ءتورت اياقتى سەرىگىم ەڭبەگىمدى اقتاپ كەلەدى. قىزمەتتىك يتىممەن بىرگە بىرنەشە ىزدەستىرۋ شارالارىنا قاتىستىق. «پۋليانىڭ» ءقازىر ناعىز كۇش-قۋاتى بويىندا تۇرعان شاعى. دەگەنمەن، يتتەرمەن كۇندەلىكتى جاتتىعۋ جاساپ تۇرۋ قاجەت. ءبىز جاتتىعۋدىڭ كوبىنە ويىن ءادىسىن قولدانامىز. ءتاتتى بەرىپ ەركەلەتەمىز. يت – وتە سەزىمتال. ول يەسىنىڭ كوڭىل كۇيىن سەزىپ تۇرادى. يەسىنە وتە ادال.
– يتىڭىزبەن بىرگە قىزمەتتە قانداي كورسەتكىشتەرگە قول جەتكىزدىڭىزدەر؟ مىسالى، قىلمىسكەردى ۇستاۋدا، جوعالعان ادامدى ىزدەۋدە نەمەسە ەسىرتكى زاتتارىن تابۋدا قانداي قىزىقتى وقيعالار بولدى؟
– ءبىرىنشى ءيتىم «مۇحتار»، ول اسكەرگە 8 جىل قىزمەت ەتىپ، «زەينەتكە» شىققان. نەمىس وۆچاركاسىنىڭ تۇقىمى قىزمەت ەتكەن جىلدارى ءتۇرلى قىلمىستاردىڭ اشىلۋىنا اتسالىستى. اسكەر كولەمىندە وتكەن جارىستارعا قاتىسىپ، العىر يت رەتىندە تالاي جۇلدەنى دە جەڭىپ الدىق.
بىلتىر جەلتوقساندا 14 جاسار كارينا ەسىمدى قىز تۇسىنىكسىز جاعدايدا جوعالىپ كەتكەنى تۋرالى اقپارات ءتۇستى. جەدەل ىزدەستىرۋدى باستاعاننان كەيىن پوليسيا «قىز قىلمىستىڭ قۇربانى بولۋى مۇمكىن» دەگەن بولجام جاسادى. جوعالعان ءجاسوسپىرىمدى ىزدەۋگە ىشكى ىستەر ورگاندارىنىڭ قىزمەتكەرلەرىمەن بىرگە 5514 اسكەري ءبولىمىنىڭ اسكەري قىزمەتشىلەرى دە جۇمىلدىرىلدى. ىزدەستىرۋ بارىسىندا ءتورت اياقتى كومەكشىم «پۋليامەن» بىرگە، بۇكىل ەلدى ءدۇر سىلكىندىرگەن وگەي اكەسىنىڭ قولىنان قازا تاپقان ورىمدەي 14 جاسار قىزدىڭ دەنەسىن تالدىقورعاننان 40 شاقىرىم قاشىقتىقتاعى تەكەلى تاۋىنان تاپتىق.
– وتباسىڭىز تۋرالى ايتا كەتسەڭىز.
– جۇبايىم جادىرا رۋسلانقىزىمەن 2018 جىلى شاڭىراق كوتەردىك. ءبىر ۇل، ءبىر قىز تاربيەلەپ وتىرمىز. قىزىم رايانا 4 جاستا، بالاباقشاعا بارىپ ءجۇر. 3 جاسار ۇلىم فارابي اتا-اجەسىنىڭ قاسىندا. مەن وقۋ-جاتتىعۋلارعا كەتكەن كەزدە ۇيدەگى بالا-شاعاما اتا-انام باس-كوز بولىپ وتىرادى. ۇيدەگى جارىم دا قاس-قاباعىما قارايدى. مەنى ءتۇسىنىپ، ۇنەمى سىيلاپ وتىرادى. 
– ۇل تاربيەلەپ وتىر ەكەنسىز. بالاڭىز اكە جولىن قۋىپ، اسكەري بولامىن دەگەن تاڭداۋ جاساسا، قالاي قارايسىز؟
– ارينە، ەگەر اسكەر جولىن تاڭداپ جاتسا، قۋانا قابىلدايمىن. بالامنىڭ تاڭداۋىن ءارقاشان قولدايمىن. «اكە كورگەن وق جونار» دەمەكشى، ۇلىم مەن ۇيگە كەلگەن كەزدە كيىمدەرىمدى كيىپ الىپ وينايدى. "اكە، مەن وسكەندە پولكوۆنيك بولامىن" دەيدى. وتان قورعاۋ – ابىرويلى ءىس. ابىرويلى ءىستى ابىرويمەن الىپ جۇرگەنگە جەتەتىن دۇنيە جوق.
– سۇحباتىڭىزعا راقمەت! قىزمەتىڭىزگە تابىس تىلەيمىز.