ءبىرىنشى قالالىق اكەلەر فورۋمى ءوتتى
قالا كۇنى قارساڭىندا ناۋرىزباي اۋدانىندا ورنالاسقان وقۋشىلاردىڭ يننوۆاسيالىق شىعارماشىلىق ورتالىعىنىڭ ءماجىلىس زالىندا وتباسى كۇنىنە ارنالعان «اكە – اسقار تاۋ، بيىك شىڭ» اتتى ءبىرىنشى قالالىق اكەلەر فورۋمى ءوتتى، دەپ حابارلايدى Almaty-akshamy.kz.
فورۋمعا قوناق رەتىندە ارداقتى اكەلەر – قالامىزداعى تانىمال كاسىپكەرلەر، ءبىلىم سالاسىنداعى بەلسەندىلەر، ەڭبەك ادامدارى قاتىستى. فورۋم تورىندە ءوزى وتباسىنداعى جيىرماسىنشى ۇل سانالاتىن ق ر پارلامەنتى ءماجىلىسىنىڭ دەپۋتاتى كەنجەعۇل سەيىتجاننىڭ تولقي سويلەگەنى تالاي اكەگە وي تاستاپ، سەرپىلتكەنى ءسوزسىز. فورۋمنىڭ مودەراتورى الماتى قالالىق ءماسليحاتىنىڭ دەپۋتاتى سەرىك ەسماتوۆ بولدى. «اكەلەر وداعى» رقب الماتى فيليالىنىڭ جەتەكشىسى ءاليحان مۇساتايەۆ تا تەبىرەنە سويلەدى.
«وسى فورۋمدى ۇيىمداستىرۋعا سەپ بوپ وتىرعان الماتى اكىمدىگىنە، ايەلدەر ىستەرى جانە وتباسى دەموگرافيالىق ساياسات كوميسسياسىنا العىس ايتامىز. مىنا جيىنعا قالامىزداعى قوعامدىق جۇمىستاردا ىسكەرلىگىمەن تانىلعان قىز-كەلىنشەكتەرىمىز تىك تۇرىپ قىزمەت ەتىپ جاتقانىنا سۇيسىندىك. وزدەرى دەمەۋشىلىك ەتىپ، وزدەرى ۇيىمداستىردى. وسى فورۋمنىڭ باسى-قاسىندا جۇرگەن، ءادىلقازى القاسىنىڭ حاتشىسى گۇلنارا قاسىمبەكقىزىنا العىسىمىز ايرىقشا. ارينە، ەر ازاماتتارىمىزدىڭ سىن-سايىسىنا باعا بەرۋ بىزگە وڭايعا سوققان جوق»، – دەدى ءادىلقازى القاسىنىڭ ءتورايىمى زاۋرەش امانجولوۆا.
سونىمەن، جەڭىمپاز دەپ تانىلعان اكەلەر 5 اتالىمدا: تاجىبەك دۇكەنوۆ – «زەردەلى اكە»، بولاتحان جاكەنوۆ – «كرەاتيۆ-اكە»، سارقىتباي رىسبايەۆ – «شىعارماشىل اكە»، ساين يبراگيم – «سپورتشى اكە»، ەربول ءىلياسوۆ – «ءانشى اكە» اتانىپ، اقشالاي جانە ارناۋلى جۇلدەلەرمەن ماراپاتتالدى.