ءۇيدىڭ جانىندا بولعان سوڭ ءقازىر جوندەۋ جۇمىستارى ءجۇرىپ جاتقان ۇلتتىق عىلىم اكادەمياسىنىڭ عيماراتى جانىنان ءجيى وتەمىن. انشەيىندە زەر سالىپ قاراي بەرمەيدى ەكەنبىز. كەشە شيەۆچەنكو كوشەسى جاعىنان زەر سالىپ قاراسام عيماراتتىڭ قاسبەتىنىڭ ماڭدايىندا قازاقشا «قازاق سسر عىلىم اكادەمياسى» دەپ، استىندا ورىسشا «اكادەميا ناۋك كازاحسكوي سسر» دەگەن كونە جازۋى كوزگە ۇرىپ تۇر. بۇل جوندەۋدەن وتكەننەن سوڭعى قالپى! ونىڭ بۇرىنعى اتاۋىن قازىرگى تاۋەلسىزدىك كەزەڭىنە كىم تىقپالاپ ءجۇر؟
ءيا، قازاق سسر عىلىم اكادەمياسى ارنايى قاۋلىمەن 1946 جىلعى 1 ماۋسىمدا قۇرىلعانى بارشاعا ءمالىم. ول 1993 جىلى 21 قاڭتاردا پرەزيدەنت جارلىعىمەن «قازاقستان رەسپۋبليكاسىنىڭ ۇلتتىق عىلىم اكادەمياسى» بولىپ قايتا قۇرىلعان. ياعني مەملەكەتتىڭ تاۋەلسىزدىك الۋىنا بايلانىستى مارتەبەسى وزگەرتىلدى.
2023 جىلعى 27 ناۋرىزدا «قازاقستان رەسپۋبليكاسى ۇلتتىق عىلىم اكادەمياسىنىڭ كەيبىر ماسەلەلەرى تۋرالى» قازاقستان رەسپۋبليكاسى پرەزيدەنتىنىڭ №152 جارلىعىمەن «قازاقستان رەسپۋبليكاسىنىڭ ۇلتتىق عىلىم اكادەمياسى» كوممەرسيالىق ەمەس اكسيونەرلىك قوعامى قازاقستان رەسپۋبليكاسى پرەزيدەنتىنىڭ جانىنداعى «قازاقستان رەسپۋبليكاسىنىڭ ۇلتتىق عىلىم اكادەمياسى» كوممەرسيالىق ەمەس اكسيونەرلىك قوعامى بولىپ وزگەرتىلدى. اراعا جارتى اي سالىپ ۇكىمەتتىڭ دە وسىنداي قاۋلىسى شىقتى.
2023 جىلى 11 ساۋىردە كۇنسۇلۋ دالتون قىزى زاكاريا «قازاق سسر عىلىم اكادەمياسىنىڭ» ەمەس، قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى لاۋازىمىنا تاعايىندالدى.
ءدال بۇگىنگى تاڭدا بۇل عىلىم ورداسىنىڭ اتاۋى رەسمي قۇجاتتاردا كورسەتىلگەندەي «قازاقستان رەسپۋبليكاسىنىڭ ۇلتتىق عىلىم اكادەمياسى»!
ال جوندەۋ جۇمىسى جۇرگىزىلىپ جاتقان عيماراتتىڭ ماڭدايشاسىنداعى قازاقشا «قازاق سسر عىلىم اكادەمياسى» دەپ، ورىسشا «اكادەميا ناۋك كازاحسكوي سسر» دەپ جازىلعان جازۋلار ساياسي قاتە! بۇل كەشەگى كەڭەستىك وتارشىل جۇيەنىڭ قالدىعى! سوندىقتان عىلىمنىڭ قاسيەتتى قارا شاڭىراعىنداعى قاسبەت جازۋى تۇزەتىلۋگە ءتيىس!