تالدىقورعاندا جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى اقسۋ اۋدانىنىڭ تۇرعىنى ايزات جۇمانوۆانىڭ ولىمىنە قاتىستى ءىستى قاراپ، ۇكىم شىعاردى، دەپ حابارلايدى Aqshamnews.kz ءتىلشىسى.
سوتتا مارقۇمنىڭ جۇبايى ايبار جانبولات ق ر قك 99-بابى 1-بولىگى («ادام ءولتىرۋ») بويىنشا ايىپتالدى. سوتتىڭ انىقتاۋىنشا، 2025 جىلعى 22 ماۋسىمعا قاراعان ءتۇنى ايىپتالۋشى ماس كۇيدە جابىرلەنۋشىنى ءۇي اۋلاسىنان شىعارىپ، سوققى جاساعان. ايەل العان جاراقاتتارىنان كەيىن مەديسينالىق مەكەمەدە كوز جۇمعان.
ايىپتالۋشىنىڭ كىناسى سوت ساراپتامالارىنىڭ قورىتىندىلارىمەن، كۋاگەرلەردىڭ جاۋاپتارىمەن، تەرگەۋ ارەكەتتەرى حاتتامالارىمەن جانە قىلمىستىق ءىس ماتەريالدارىمەن دالەلدەنگەن. سوت ونىڭ بۇرىن سوتتالماعانىن جانە كىنانى ءىشىنارا مويىنداعانىن ەسكەرگەنىمەن، قىلمىستى الكوگولدىك ماس كۇيدە جاساۋى اۋىرلاتاتىن ءمان-جاي رەتىندە تانىلدى.
ناتيجەسىندە سوت ايبار جانبولاتتى كىنالى دەپ تانىپ، 14 جىلعا باس بوستاندىعىنان ايىرۋ جازاسىن تاعايىندادى. ول جازاسىن ورتاشا قاۋىپسىزدىك مەكەمەسىندە وتەيدى. ايتا كەتەيىك، پروكۋرور بۇعان دەيىن ايىپتالۋشىعا 15 جىل سۇراعان. ۇكىم ازىرگە زاڭدى كۇشىنە ەنگەن جوق.