وسىلايشا سۋرەتشىنىڭ بەس ايعا جۋىق توككەن ماڭداي تەرى ءبىر ساتتە جويىلعان
ايۋساي شاتقالىنداعى «مىڭ كوز» سوقپاعىنا سالىنعان پەتروگليفتەردى ۆاندالدار ءبۇلدىرىپ كەتتى. بۇل تۋرالى «ايۋساي» ۆيزيت - ورتالىعىنىڭ باسپا ءسوز قىزمەتى Instagram پاراقشاسىندا جازدى، دەپ حابارلايدى Almaty-akshamy.kz.
«ءبىزدىڭ ايۋساي شاتقالىنداعى «مىڭ كوز» سوقپاعىنا بەلگىلى سۋرەتشى سانجار جۇبانوۆ سالعان جانۋارلاردىڭ پەتروگليفتەرى ءسان بەرىپ تۇر. بۇل تاس گراۆيۋرالار سوقپاق جولدىڭ بويىندا ورنالاسقان جانە وندا قار بارىسى، تيان-شان قوڭىر ايۋى، سىلەۋسىن جانە ت.ب. سيرەك كەزدەسەتىن جانۋارلاردىڭ سۋرەتتەرى بار. ءقازىر ولار «مىڭ كوز» سوقپاعىنىڭ عانا ەمەس، سونىمەن بىرگە ءبىزدىڭ ورتالىقتىڭ، بۇكىل ايۋساي شاتقالىنىڭ قۇندىلىعى بولىپ تابىلادى»، - دەلىنەدى حابارلامادا.
وكىنىشكە قاراي، جاقىندا «مىڭ كوز» سوقپاعىنداعى پەتروگليفتەردى ۆاندالدار ءبۇلدىرىپ كەتكەن. وسىلايشا سۋرەتشىنىڭ بەس ايعا جۋىق توككەن ماڭداي تەرى مەن كۇش-جىگەرىن جۇمساعان تۋىندىلارى ءبىر ساتتە جويىلعان.
«ءبىز سانجار جۇبانوۆپەن بۇلىنگەن پەتروگليفتەردى قالپىنا كەلتىرۋ تۋرالى ۋاعدالاستىق. سونداي-اق، ءبىز بارلىق تۋريستەر مەن شاتقالعا جانە ىلە-الاتاۋ ۇلتتىق پاركىنە كەلۋشىلەردى وسى جەرگە قۇرمەت كورسەتۋگە شاقىرامىز»، - دەپ حابارلادى «ايۋساي» ۆيزيت-ورتالىعى جەلىدە.
سونداي-اق ۆيزيت-ورتالىقتىڭ باسپا ءسوز قىزمەتى ازاماتتاردى ۆانداليزم ىس-ارەكەتتەرىنە كۋا بولعان جاعدايدا، قاجەتتى شارالار قابىلداۋ ءۇشىن «ايۋساي» ۆيزيت-ورتالىعىنىڭ اكىمشىلىگىنە دەرەۋ حابارلاسۋدى سۇرادى.