ايۋلار قىسقى ۇيقىعا كەتتى

جىل باسىنان بەرى الماتى قورىعىندا قازاقستاننىڭ قىزىل كىتابىنا ەنگەن تيان-شان قوڭىر ايۋى فوتوتۇزاققا 15 رەت ءتۇسىپ قالعان.

ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى ءمالىم ەتكەندەي، قازان-قاراشا ايلارىندا تاۋ باسىنا قالىڭ قار تۇسكەن ۋاقىتتا تيان-شان قوڭىر ايۋلارى قىسقى ۇيقىعا كەتەدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

ونىڭ ۇزاقتىعى - 4-5 اي، ال انالىعى مەن قونجىقتارى ءبىر ايعا ۇزاق ۇيىقتايدى.

جابايى اڭداردىڭ ءىزى، ولاردىڭ اعاش پەن تاستارعا قالدىرعان بەلگىلەرى كەزدەسكەن جەرلەرگە قورىقتىڭ عىلىمي قىزمەتكەرلەرى مەن مەملەكەتتىك ينسپەكتورلارى فوتوتۇزاق ورناتادى.

«2022 جىلدىڭ باسىنان بەرى تيان-شان قوڭىر ايۋلارى 15 مارتە فوتوتۇزاققا تۇسكەن. جىرتقىش اڭ بارلىق ءىرى شاتقالداردا تەڭىز دەڭگەيىنەن 1200-2800 مەتر بيىكتىكتە ارالاس جانە قىلقان جاپىراقتى ورمانداردا مەكەن ەتەدى. الايدا، بىلتىر 3470 مەتر بيىكتىكتە جۇرگەنى فوتوتۇزاققا ىلىككەن بولاتىن»،- دەلىنگەن حابارلامادا.

كۇزگى ساناققا سايكەس، الماتى قورىعى اۋماعىندا 26 تيان-شان قوڭىر ايۋى بار.