قازاقستاننىڭ ەڭ ءىرى اۋە كومپانياسى – Air Astana اكسيونەرلىك قوعامى وسى جىلدىڭ ءۇشىنشى توقسانىنداعى جانە 2024 جىلدىڭ 9 ايىنداعى قارجىلىق جانە وپەراسيالىق ناتيجەلەرىن جاريالادى.
كومپانيانىڭ مالىمەتىنشە، وتكەن جىلدىڭ سايكەس كەزەڭىمەن سالىستىرعاندا كىرىستەر 10،4%-عا ءوسىپ، 410،0 ملن اقش دوللارعا جەتكەن. جولاۋشى تاسىمالى وتكەن جىلمەن سالىستىرعاندا 9،9%-عا ارتىپ، كومپانيا 9 اي ىشىندە 2،8 ميلليون ادام تاسىمالداعان.
Air Astana توبىنىڭ باس اتقارۋشى ديرەكتورى پيتەر فوستەر كومپانيانىڭ وزگە دە جەتىستىكتەرى تۋرالى ايتىپ ءوتتى:
– مەن جالپى اۆياسيا سالاسىنا جاسالىپ جاتقان قىسىمدارعا قاراماستان، ءۇشىنشى توقسانداعى قىزمەتتىڭ جوعارى ناتيجەلەرى تۋرالى قۋانا حابارلايمىن. ءبىز كومپانيانىڭ تاسىمالداۋ سىيىمدىلىعى مەن وپەراسيالىق تيىمدىلىگىن ارتتىرۋدا ايتارلىقتاي جەتىستىكتەرگە جەتۋدەمىز. ءبىزدىڭ فلوتتى دامىتۋ جوسپارى كەستەدەن وزىپ ورىندالىپ، ۇشاقتار سانى 57-گە جەتتى. سونىمەن قاتار، ءبىز 2024 جىلى فلوتتان ەكى E2 ۇشاعىن شىعاردىق، ال كەلەسى جىلى دا E2 ۇشاقتارىن شىعارۋدى جوسپارلاپ وتىرمىز، – دەدى ول.
سونداي-اق، پيتەر فوستەر Air Astana توبىنىڭ جاپونيا اۋە كومپانياسىمەن سەرىكتەستىك ورناتقانىن اتاپ ءوتتى:
– تامىزدا ءبىز الەمدەگى ۇزدىك اۋە كومپانيالارىنىڭ ءبىرى Japan Airlines (JAL) كومپانياسىمەن كودشەرينگتىك كەلىسىمگە قول قويدىق. بۇل قازاقستان مەن جاپونيا اراسىنداعى ىسكەر ادامدار مەن تۋريستەر ءۇشىن قاتىناستى ارتتىرادى جانە ەلدەرىمىز اراسىنداعى جولاۋشىلار لەگى مەن تاۋار اينالىمىن كەڭەيتۋگە ىقپال ەتەدى، – دەدى ول.
تاقىرىپقا وراي
اۋە بيلەتىن قاشان ساتىپ العان ابزال؟
پيتەر فوستەر، Air Astana توبىنىڭ باس اتقارۋشى ديرەكتورى:
– مەنىڭ باستى كەڭەسىم – ۇشاققا بيلەتتى الدىن الا الىڭىزدار. ەگەر ەۋروپاعا ساياحاتتاعىڭىز كەلسە، ماۋسىم نەمەسە قىركۇيەك ايلارىنا بيلەت العان ابزال. ازيا قۇرلىعىن ارالاعىڭىز كەلسە، قىسقى مەزگىل – ەڭ قولايلى ۋاقىت. ءبىراق كەلەسى ءۇش ۋاقىتتان اۋلاق بولعان ءجون: ەۋروپادا روجدەستۆو مەن جاڭا جىل تويلاناتىن كەزەڭ، سونداي-اق جۇڭگو جاڭا جىلى. بۇل ۋاقىتتا ادام كوپ، جانە كەز كەلگەن قىزمەتتىڭ باعاسى وتە جوعارى بولادى.