بۇل جولعى سەبەپتە رەيستەردىڭ كەشىكتىرىلۋىنە قاتىستى بولدى
Fly Arystan الماتى – اتىراۋ باعىتى بويىنشا رەيستى كەشىكتىرگەنى ءۇشىن Air Astana اۋەكومپانياسىنا ايىپپۇل سالىندى، دەپ حابارلايدى Almaty-akshamy.kz «حابار 24» سايتىنا سىلتەمە جاساپ.
كوميتەت وكىلدەرىنىڭ ايتۋىنشا، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆتىڭ تاپسىرماسى بويىنشا ااك رەيستەردى كەشىكتىرۋ كەزىندە جولاۋشىلاردىڭ قۇقىقتارىن بۇزعانى ءۇشىن اۆياتاسىمالداۋشىلاردى جاۋاپكەرشىلىككە تارتۋدى جالعاستىرادى.
«تەرگەۋ بارىسىندا 2022 جىلدىڭ 16 شىلدەسىندە «ەير استانا» كومپانيالار توبىنا كىرەتىن «Fly Arystan» بولىمشەسىنىڭ الماتى – اتىراۋ باعىتى بويىنشا كس-7202 رەيسى 12 ساعات 9 مينۋتقا كەشىكتىرىلگەنى انىقتالدى. ۇشۋدى كۇتكەن كەزدە وسى رەيستىڭ جولاۋشىلارىنا قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى ق ر زاڭىنىڭ 86-بابىنىڭ 1-بولىگىندە كوزدەلگەن قىزمەتتەر، اتاپ ايتقاندا، قوناق ۇيدە تۇرۋ بويىنشا قىزمەتتەر تيىسىنشە ۇسىنىلماعان»، – دەلىنگەن حابارلامادا.
وسىعان بايلانىستى بيىل 4 تامىزدا اۋەكومپانياعا قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 567-بابىنىڭ 2-بولىگى بويىنشا اكىمشىلىك قۇقىق بۇزۋشىلىق تۋرالى حاتتاما جاسالىپ، وعان سايكەس اۋەكومپانياعا 1 000 اەك (3 063 000 تەڭگە) مولشەرىندە ايىپپۇل سالىنعان.
«بۇل «ەير استانا» اۋەكومپانياسى توبىنىڭ رەيس كەشىكتىرىلگەن كەزدە جولاۋشىلار قۇقىقتارىنىڭ بۇزىلۋى سەبەبىنەن وتكەن ايدا جالپى سوماسى 12 ملن تەڭگەدەن اساتىن اكىمشىلىك جاۋاپكەرشىلىككە تارتۋدىڭ ءتورتىنشى جاعدايى. كوميتەت زاڭنامادا كوزدەلگەن مىندەتتەمەلەردى ورىنداماعان جاعدايدا اۆياتاسىمالداۋشىلاردى اكىمشىلىك جاۋاپكەرشىلىككە تارتۋ ءۇشىن قاجەتتى شارالار قابىلدايدى»، – دەپ اتاپ ءوتتى ازاماتتىق اۆياسيا كوميتەتىنىڭ ءتوراعاسى تالعات لاستايەۆ.