ايىپپۇلدىڭ جالپى سوماسى 12 ميلليون تەڭگەدەن استى.
Fly Arystan رەيستەرىن كەشىكتىرگەنى ءۇشىن Air Astana كومپانيالار توبىنا تاعى دا ايىپپۇل سالىندى، دەپ حابارلايدى Almaty-akshamy.kz ازاماتتىق اۆياسيا كوميتەتىنە سىلتەمە جاساپ.
قازاقستاننىڭ يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆتىڭ تاپسىرماسى بويىنشا كوميتەت رەيستەردىڭ كەشىگۋى كەزىندە جولاۋشىلاردىڭ قۇقىقتارىن بۇزعانى ءۇشىن اۋە تاسىمالداۋشىلاردى جاۋاپكەرشىلىككە تارتۋدى جالعاستىرىپ جاتىر.
ازاماتتىق اۆياسيا كوميتەتى تەرگەۋ بارىسىندا انىقتاعانداي، 2022 جىلدىڭ 16 شىلدەسىندە Air Astana كومپانيالار توبىنا كىرەتىن Fly Arystan بولىمشەسىنىڭ الماتى – اتىراۋ باعىتىنداعى كس-7202 رەيسى 12 ساعات 9 مينۋتقا كەشىككەن. وسى رەيستىڭ جولاۋشىلارى ۇشۋدى كۇتۋ كەزىندە ولارعا قازاقستاننىڭ اۋە كەڭىستىگىن پايدالانۋ جانە اۆياسيا قىزمەتى تۋرالى زاڭنامادا كوزدەلگەن قىزمەتتەر ءتيىستى تۇردە ۇسىنىلماعان. جولاۋشىلارعا تۇراقتاۋ ءۇشىن قوناق ءۇي قاراستىرىلماعان.
«Air Astana اۋە كومپانياسى توبى رەيس كەشىگۋى كەزىندە جولاۋشىلاردىڭ قۇقىقتارىن بۇزعانى ءۇشىن سوڭعى ءبىر ايدا ءتورتىنشى رەت اكىمشىلىك جاۋاپكەرشىلىككە تارتىلىپ، جالپى سوماسى 12 ميلليون تەڭگەدەن اساتىن ايىپپۇل ارقالادى»، - دەدى ازاماتتىق اۆياسيا كوميتەتىنىڭ ءتوراعاسى تالعات لاستايەۆ.
ونىڭ ايتۋىنشا، كوميتەت زاڭنامادا كوزدەلگەن مىندەتتەمەلەردى ورىنداماعان جاعدايدا اۋە تاسىمالداۋشىلارىن اكىمشىلىك جاۋاپكەرشىلىككە تارتۋ ءۇشىن قاجەتتى شارالاردى قابىلداپ جاتىر.