«ايقاي» ءفيلمى وڭتۇستىك كورەيادا 4-13 قازان ارالىعىندا وتەتىن ايگىلى پۋسان كينوفەستيۆالىنىڭ ا Window on Asian Cinema («ازيا كينوسىنا تەرەزە») باعدارلاماسىندا كورسەتىلەتىن بولدى.
ءفيلمنىڭ رەجيسسەرى – كەنجەبەك شايقاقوۆ. «ايقاي» – رەجيسسەردىڭ ەكىنشى تولىقمەتراجدى جۇمىسى جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن العاشقى ءفيلمى، دەپ حابارلايدى Almaty-akshamy.kz ۇلتتىق كينونى قولداۋ مەملەكەتتىك ورتالىعىنىڭ باسپا ءسوز قىزمەتىنە سىلتەمە جاساپ.
«حالىقارالىق كينوفەستيۆالدەردە ءبىزدىڭ فيلمدەرىمىزگە دەگەن سۇرانىس جوعارى ەكەنىن كورىپ وتىرمىز. ازياداعى ەڭ ءىرى كينوفەستيۆالدەردىڭ بىرىندە كورسەتىلەتىن «ايقاي» كينوكارتيناسى – وسىنىڭ دالەلى. جالپى كينويندۋستريا وكىلدەرى جانە ءبىزدىڭ ورتالىق جۇمىستى ءبىر جۇيەگە قويىپ، ءار فيلم ءوز ماقساتىن ايقىنداۋى ءتيىس. بىزگە ناقتى ناتيجەلەر كەرەك. بىزگە فيلمدەرىمىزدىڭ سورەلەردە شاڭ باسىپ جاتقانى ەمەس، ولاردىڭ پروكاتقا شىعۋى، فەستيۆالدەرگە قاتىسىپ، جەتىستىكتەرگە جەتۋى ماڭىزدى»، – دەدى ۇكقمو باسقارما ءتوراعاسى قۇرمانبەك جۇماعالي.
«ايقاي» ءفيلمى كورەرمەندەرگە ەكى اياقسىز تۋىلعان باس كەيىپكەردىڭ ءومىرى ارقىلى يادرولىق جارىلىستان زارداپ شەككەن سەمەي پوليگونى قۇرباندارىنىڭ تاعدىرىن جانە اناسىنان ايىرىلعان بالانىڭ اكەسىنە جاناشىرلىعىن، قامقورلىق جاساۋعا دەگەن تالپىنىسىن باياندايدى.
كوركەم ءفيلمنىڭ ءتۇسىرىلىمى اباي وبلىسى اياگوز اۋدانى شىڭعوجا اۋىلىندا ءوتتى. باستى رولدەردەردە ورىنبەك شايماعانبەتوۆ، ارنۇر اكرام، ەربولات ءالقوجا، بەينۇر بايمۇحامبەتوۆ، ەرلان مالايەۆ، ايبەك يمانقۇلوۆ جانە ايعانىم نۇرسۇلتان وينايدى.
ايتا كەتەيىك، Busan International Film Festival 1996 جىلدان باستاپ جىل سايىن وڭتۇستىك كورەيانىڭ پۋسان قالاسىندا وتەتىن ازياداعى ەڭ ءىرى كينوفەستيۆالدەردىڭ ءبىرى.
ۇلتتىق كينونى قولداۋ مەملەكەتتىك
ورتالىعىنىڭ باسپا ءسوز قىزمەتى