بيىل بيۋدجەتتە جىلۋ جەلىلەرىن جاڭارتۋعا قارجى قاراستىرىلادى.
وڭىرلەردە جەلىلەردىڭ توزۋ دەڭگەيى 50 پايىزدان اسادى. كەيبىر ايماقتاردا بۇل كورسەتكىش 80 پايىزدان اسىپ كەتكەن، دەپ حابارلايدى Almaty-akshamy.kz.
بۇگىن وڭىرلەردى دامىتۋعا ارنالعان پارلامەنتتىك تىڭداۋدا وسى سەكىلدى قوردالانعان ماسەلەلەر تاعى ءبىر پىسىقتالدى.
"قابىلدانىپ جاتقان شارالارعا قاراماستان، وڭىرلەردە ينفراقۇرىلىم ماسەلەسى وزەكتى بولىپ تۇر، - دەدى سەنات ءتوراعاسى. - ەكىباستۇز، رۋدنىي، ريددەر قالالارىنداعى اپات - وسىنىڭ ايقىن دالەلى. ەكىباستۇز — اعادىر جەلىسىندەگى اپاتتىڭ سالدارىنان بىردەن 6 وبلىستا ەلەكتر قۋاتىن بەرۋ كولەمى شەكتەلدى. وكىنىشكە قاراي، بۇل اپاتتار كەزدەيسوق بولعان جوق. بۇل - وسى سالاداعى قوردالانعان جۇيەلى پروبلەمالاردىڭ كورىنىسى".
جالپى، ەلەكتر ستانسالارىنىڭ نەگىزگى قوندىرعىلارىنىڭ توزۋى 57 پايىزعا جەتكەن. ال جەكەلەگەن وڭىرلەردە بۇل كورسەتكىش ودان دا اسىپ كەتكەن.
«شىن مانىندە، قۋاتتى وڭىرلەر - ەلىمىزدىڭ الەۋمەتتىك-ەكونوميكالىق ءال-اۋقاتى مەن باسەكەگە قابىلەتتىلىگىنىڭ نەگىزى. مەملەكەت باسشىسى ۇنەمى وسى قاعيداعا باسا ءمان بەرىپ كەلەدى. سوندىقتان وڭىرلەردىڭ تەڭگەرىمدى دامۋىنا ىقپال ەتۋ سەناتتىڭ باسىم مىندەتتەرىنىڭ ءبىرى دەپ بەلگىلەپ وتىرمىز»، - دەدى ق ر پارلامەنتى سەناتىنىڭ ءتوراعاسى ماۋلەن اشىمبايەۆ.