قارالى قاڭتار كەزىندەگى 4 جاسار قىزدىڭ ءولىمى: قىزدىڭ اكەسى سوت زالىنا كىرگىزىلمەدى
الماتى گارنيزونىنىڭ اسكەري سوتىندا قاڭتار وقيعاسى كەزىندە قازا تاپقان ءتورت جاسار ايكوركەم مەلدەحاننىڭ ءىسى بويىنشا كەزەكتى سوت وتىرىسى ءوتىپ جاتىر. ءىس قۇپيا، سوت جابىق ءوتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.
14 تامىزدا قوعام بەلسەندىلەرى مەن ب ا ق وكىلدەرى اسكەري سوتتىڭ جانىنا جينالدى. پروسەسس جابىق ەسىك جاعدايىندا ءوتىپ جاتىر، سوت زالىنا ءتىپتى مارقۇم قىزدىڭ اكەسىن دە كىرگىزبەدى.
مۇنى سوت وكىلدەرى ىستە مەملەكەتتىك قۇپيا بولعاندىقتان، قىزدىڭ اكەسى ءالى رۇقسات الماعانىمەن ءتۇسىندىردى. سوندىقتان پروسەسس جابىق، ونىڭ ىشىندە باسپاسوزگە دە رۇقسات بەرىلمەدى.
قىزدىڭ اكەسى ايدوس مەلدەحان سوتتان مارقۇم قىزىنىڭ اتىنا شاقىرتۋ جىبەرگەنى ءۇشىن كەشىرىم سۇراۋدى تالاپ ەتىپ وتىر.
ءتورت جاسار ايكوركەم مەلدەحاننىڭ ولىمىنە قاتىستى سوت پروسەسى شىلدە ايىنىڭ سوڭىندا باستالعان. قىلمىستىق ءىستى قاراۋ بارىسى باس اسكەري پروكۋراتۋرانىڭ باقىلاۋىندا. ۆەدومستۆو بۇدان بۇرىن ءىس ماتەريالدارىندا جاريا ەتۋگە جاتپايتىن قۇپيا قۇجاتتار بار ەكەنىن ايتقان ەدى.
ءتورت جاسار ايكوركەم مەن 15 جاستاعى جانەل مەلدەحان وتىرعان كولىككە 2022 جىلدىڭ 7 قاڭتارىندا ساعات 19:00-دە سەيفۋللين مەن ساتبايەۆ كوشەلەرىنىڭ قيىلىسىندا بىرنەشە رەت وق اتىلدى. ايكوركەم سول جەردە كوز جۇمدى، اپكەسى وقتان جاراقات الدى. ءىس بويىنشا سوتتالۋشى – اسكەري قىزمەتكەر.