ۋچاسكەلىك سايلاۋ كوميسسيالارىنىڭ جۇمىسىنا كەدەرگى جاساماۋ كەرەك - ا.قالىقوۆا.
بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە اسك ءتورايىمى ايگۇل قالىقوۆا ايتتى، دەپ حابارلايدى Almaty-akshamy.kz.
«ۋچاسكەلىك كوميسسيانىڭ ىس-ارەكەتى زاڭ اياسىندا - ولار داۋىس بەرۋ ءۇشىن العان بيۋللەتەندەردى قايتا ساناۋعا مىندەتتى. بىزدە كانديداتۋرالارىن الىپ تاستاعان نەمەسە زاڭ بۇزۋشىلىقتارعا بايلانىستى كەرى قايتارىلعان كانديداتتاردىڭ سانى ايتارلىقتاي كوپ. «قازاقستان رەسپۋبليكاسىنداعى سايلاۋ تۋرالى» زاڭعا سايكەس، قازاقستان رەسپۋبليكاسى ورتالىق سايلاۋ كوميسسياسىنىڭ 2018 جىلعى 19 قىركۇيەكتەگى №16/20 قاۋلىسىندا بەكىتىلگەندەي، كانديداتتىقتى الىپ تاستاۋ، كانديداتتى ۇسىنۋ تۋرالى شەشىمنىڭ كۇشىن جويۋ، كانديداتتاردى، پارتيالىق تىزىمدەردى تىركەۋ تۋرالى شەشىمنىڭ كۇشىن جويۋ تۋرالى ىستەر بويىنشا سايلاۋ بيۋللەتەندەرىن وزگەرتۋ قاعيدالارى بەكىتىلدى، ۋچاسكەلىك سايلاۋ كوميسسيالارى بۇل جۇمىستى داۋىس بەرۋ كۇنىنە دەيىن جۇرگىزۋگە مىندەتتى»، - دەدى ا.قالىقوۆا.
ياعني، داۋىس بەرۋ كۇنى بيۋللەتەندە قالعان كانديداتتار عانا بولۋى كەرەك. بۇل ەرەجەدە بيۋللەتەندەردەن شىعارىلاتىن كانديداتتاردىڭ ءاتى-جونى قالاي الىنىپ تاستالاتىنى ناقتى سيپاتتالعان.
الماتى اۋماقتىق سايلاۋ كوميسسياسىنىڭ مالىمەتىنشە، 16 ناۋرىزعا دەيىن كەيبىر كانديداتتار تىركەۋدەن الىنىپ، سايلاۋعا قاتىسپايدى. الايدا، وسى كەزگە دەيىن مىڭداعان بيۋللەتەندەر باسىلىپ شىققان بولاتىن. سوندىقتان دا بۇل كۇندەرى ۋچاسكەلىك سايلاۋ كوميسسيالارىنىڭ مۇشەلەرى داۋىس بەرۋ كۇنىنە دايىنداۋ ءۇشىن بيۋللەتەندەردەن ولاردىڭ مالىمەتتەرىن سىزىپ تاستاۋعا ءماجبۇر.
ماسەلەن، ءۇشىنشى سايلاۋ وكرۋگى بويىنشا ءماجىلىس دەپۋتاتتىعىنا 38 ۇمىتكەر بولسا، ءقازىر ولاردىڭ سانى - 30. بيۋللەتەندەردەن سەگىز ادامنىڭ ەسىمىن الىپ تاستاۋ كەرەك جانە بۇل الدىن الا جاسالۋى كەرەك. بەسىنشى وكرۋگتە 34 بولدى، 24 قالدى.
ولار زاڭ اياسىندا جۇمىس ىستەيدى، دەگەنمەن باق-تا دۇرىس اقپارات بەرىلمەدى، بۇل كەيبىر كانديداتتاردىڭ سەنىم بىلدىرىلگەن ادامدارىنىڭ سايلاۋ ۋچاسكەلەرىنە كەلۋىنە تۇرتكى بولدى.
ايگۇل قالىقوۆا ۋچاسكەلىك سايلاۋ كوميسسيالارىنىڭ جۇمىسىنا كەدەرگى جاساماۋعا شاقىردى. ولار بۇگىن جانە ەرتەڭنەن كەشىكتىرمەي ءاربىر بيۋللەتەننەن شىعىپ قالعان كانديداتتاردى سىزىپ تاستاۋعا مىندەتتى.
سونداي-اق، الماتى اسك ءتورايىمى سايلاۋ ۋچاسكەلەرىندە پارتيالىق پلاكاتتار ءىلۋلى تۇرعانى، ءبىراق ءبىر مانداتتى كانديداتتار تۋرالى اقپارات جوق دەگەن اقپاراتقا قاتىستى پىكىر ءبىلدىردى.
ايگۇل قالىقوۆانىڭ ايتۋىنشا، بارلىق اقپاراتتىق پلاكاتتار دايىندالعان. ەرتەڭ، 18 ناۋرىز كۇنى تۇسكە دەيىن ولار ۋچاسكەلىك كوميسسيالاردىڭ اقپاراتتىق ستەندتەرىنە ورنالاستىرىلادى. زاڭعا سايكەس، بۇل اقپاراتتىق پلاكاتتار بەلگىلى ءبىر ۋاقىتقا ءىلىنۋى ءتيىس دەگەن تالاپتار جوق. بۇل تالاپ، اسىرەسە، سايلاۋ كۇنىنە قاتىستى.