زاڭ جوباسىنىڭ ماقساتى قازاقستان رەسپۋبليكاسىنىڭ مەملەكەتتىك جاستار ساياساتى جانە الەۋمەتتىك قامسىزداندىرۋ سالاسىنداعى زاڭناماسىن جەتىلدىرۋ بولىپ تابىلادى.
زاڭ جوباسى 1 كودەكس پەن 13 زاڭعا وزگەرىستەر مەن تولىقتىرۋلار ەنگىزۋدى كوزدەيدى، ولار كەلەسى تۇجىرىمدامالىق تۇزەتۋلەر مەن نوۆەللالاردى قامتيدى:
- جاستاردىڭ جاسىن 35 جاسقا دەيىن ۇلعايتۋ؛
- "جاستاردى دامىتۋ يندەكسى"، "جاستاردىڭ الەۋمەتتىك قىزمەتتەرى"، "ۋاقىتشا ورنالاستىرىلماعان جاستار"، "جاستارمەن جۇمىس جونىندەگى مامان"، "جاستاردىڭ ەڭبەك جاساقتارى" ۇعىمدارىن زاڭنامالىق بەكىتۋ؛
- جاستار رەسۋرستىق ورتالىقتارىنىڭ فۋنكسيالارىن كەڭەيتۋ؛
- مەملەكەتتىك جاستار ساياساتىنىڭ نەگىزگى باعىتتارىنا جاستاردىڭ سيفرلىق ساۋاتتىلىعىن ارتتىرۋدى جانە جاستار اراسىندا ۆولونتەرلىكتى دامىتۋدى ەنگىزۋ؛
- ۋاكىلەتتى ورگاننىڭ قۇزىرەتىنە جاستارمەن جۇمىس جونىندەگى مامانداردىڭ ۇلگىلىك بىلىكتىلىك سيپاتتامالارىن جاستاردىڭ ەڭبەك جاساقتارىن قۇرۋ، ۇيىمداستىرۋ، قامتاماسىز ەتۋ، سونداي-اق ولاردىڭ قىزمەتىنە مونيتورينگ جۇرگىزۋ قاعيدالارىن، جاستاردى دامىتۋ يندەكسىن ەندىرۋ جانە قولدانۋ قاعيدالارىن ازىرلەۋ جانە بەكىتۋ جونىندەگى فۋنكسيالاردى ەنگىزۋ؛
- بالا كۇتىمى بويىنشا جاردەماقى تولەۋ مەرزىمىن 1،5 جاسقا دەيىن ۇلعايتۋ؛
- جوسپارلانعان ايەلدەردىڭ زەينەتكەرلىك جاسىن ارتتىرۋدى 2023 جىلدان باستاپ 2028 جىلعا دەيىن 61 جاس دەڭگەيىندە توقتاتا تۇرۋ؛
- بازالىق زەينەتاقى مولشەرىن كەزەڭ-كەزەڭىمەن ۇلعايتۋ؛
- ورتاق زەينەتاقى مولشەرىن ەسەپتەۋ كەزىندە تابىستىڭ ەڭ جوعارى شەكتەلۋىن 46 اەك-تەن 55 اەك-كە دەيىن ارتتىرۋ؛
- ساقتاندىرىلعان ادامدار ءۇشىن جۇمىسىنان ايىرىلۋ بويىنشا الەۋمەتتىك تولەمدەردىڭ مولشەرىن ورتاشا ايلىق تابىستىڭ 45%-نا دەيىن ارتتىرۋ؛
- مەملەكەتتىك اتاۋلى الەۋمەتتىك كومەك الۋشىلارعا ۇسىنىلاتىن كەپىلدەندىرىلگەن الەۋمەتتىك پاكەتتى مونەتيزاسيالاۋ؛
- سۇرانىسقا يە كاسىپتەرى مەن داعدىلارى بار شەتەلدىكتەرگە قازاقستان رەسپۋبليكاسىندا تۇراقتى تۇرۋعا رۇقسات بەرۋ ءۇشىن تولەم قابىلەتتىلىگىن راستاۋ تۋرالى تالاپتى الىپ تاستاۋ.
"قازاقستان رەسپۋبليكاسى پارلامەنتى سەناتىنىڭ تۇراقتى كوميتەتتەرىنەن زاڭ جوباسىنىڭ تۇجىرىمداماسى بويىنشا ەسكەرتۋلەر مەن ۇسىنىستار كەلىپ تۇسكەن جوق. باياندالعاندى ەسكەرە وتىرىپ، الەۋمەتتىك-مادەني دامۋ جانە عىلىم كوميتەتى، سەنات رەگلامەنتىنىڭ 58-تارماعىن باسشىلىققا الا وتىرىپ، قازاقستان رەسپۋبليكاسى پارلامەنتىنىڭ ءماجىلىسى ماقۇلداعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسى زاڭىنىڭ جوباسىن ءبىرىنشى وقىلىمدا ماقۇلداۋدى ۇسىنادى"، – دەدى اقمارال ءالنازاروۆا.