ق ر پارلامەنتى ءماجىلىسىنىڭ دەپۋتاتى ايدوس سارىم ەلدەگى قازىرگى جاعداي، پرەزيدەنت مالىمدەمەسى مەن ۇكىمەت وتستاۆكاعا كەتۋىنە قاتىستى پىكىر ءبىلدىردى، دەپ حابارلايدى almaty-akshamy.kz قازاقپاراتقا سىلتەمە جاساپ.
«گاز باعاسىنىڭ قىمباتتاۋىنا قاتىستى حالىقتىڭ تالابى ورىندى دەپ ويلايمىن. جالپى، ەلدە ەكونوميكالىق شەشىم قابىلدار كەزدە، ونىڭ الەۋمەتتىك-ساياسي تۇسىن دا ۇمىتپاعان ءجون. حالىق تاعدىرى مەن مۇددەسىنە قاتىستى زاڭ، رەفورما نەمەسە شەشىم قابىلدار الدىندا جۇرتتى حاباردار ەتكەن دۇرىس. ياعني ءبىز جوسپار قۇرىپ، شەشىم قابىلداعان كەزدە الدىمەن ادامنىڭ مۇددەسىن ەسكەرۋىمىز قاجەت. سوسىن حالىق ءۇشىن ىسكە اسىپ جاتقانى شارانى ارتىق-كەم تۇسىن سارالاپ، اپروباسيادان وتكىزۋ كەرەك. تاعى ءبىر ماڭىزدى دۇنيە - بولىپ جاتقان جانە بولايىن دەپ جاتقان جايت تۋرالى حالىقتى جان-جاقتى اقپاراتتاندىرۋ ماڭىزدى»، - دەدى ايدوس سارىم.
ونىڭ ايتۋىنشا، ەندى جاساقتالاتىن ۇكىمەت جوعارى ايتىلعان جايتتاردى نازارعا العان ءجون.
«بۇگىن مەملەكەت باسشىسى قوزعاعان تاعى ءبىر ماڭىزدى ماسەلە - جەكە تۇلعالاردىڭ ءوزىن بانكروت دەپ جاريالاي الۋى. ومىردە ءتۇرلى جاعداي بولىپ جاتادى، ادامدار قارىزعا باتىپ جاتادى نەمەسە نەسيەسىن ۋاقىتىلى تولەي الماۋى مۇمكىن. سونداي جاعدايدا تەك زاڭدى تۇلعالار عانا ەمەس، جەكە تۇلعالار دا ءوزىن بانكروت دەپ تانۋى - جەكە ماسەلەنى شەشۋدىڭ ءبىر جولى. جانە بۇل ءبىراز ەلدەردە بار تاجىريبە. كوممۋنالدىق تاريفتەردىڭ باعاسى دا ۋاقىتىلى كوتەرىلىپ وتىر. سەبەبى ونىڭ سالماعى باياعى حالىقتىڭ قالتاسىنا تۇسەدى جانە پرەزيدەنت 180 كۇندى بەلگىلەپ وتىر، ياعني وسى ۋاقىتتىڭ ىشىندە جاعدايدى ءبىرجاقتى قىلۋ كەرەك. بۇل - ۇكىمەتكە جۇكتەلەتىن مىندەت»، - دەدى ول.
ودان بولەك، حالىق قالاۋلىسى ۇكىمەتتىڭ وتستاۆكاعا كەتۋىنە قاتىستى ءوز ويىن ءبىلدىردى.
«ءوز باسىم پرەمەر-مينيستر دۇرىس شەشىم قابىلدادى دەپ ەسەپتەيمىن. ۇكىمەت باسشىسىنىڭ جاۋاپكەرشىلىكتى ءوز موينىنا الىپ، وتستاۆكاعا كەتۋى زاڭدى ءارى ازاماتتىق شەشىم دەپ ويلايمىن. بۇگىندە ۇكىمەتتىڭ جاڭا قۇرامىن جاساقتاۋعا كىرىسىپ جاتىر، جۋىردا فراكسيا وتىرىسى وتەدى»، - دەدى ا. سارىم.
سونداي-اق، ءماجىلىس دەپۋتاتى قۇقىق قورعاۋ ورگاندارى الەۋمەتتىك جەلىدە تاراپ جاتقان ءتۇرلى اقپاراتتار مەن ۆيدەولارعا ساراپتاما جۇرگىزۋ كەرەكتىگىن ايتتى.
«ارانداتۋشىلىقتان اۋلاق بولۋ كەرەك. ياعني حالىقتى شاتاستىرۋعا جول بەرمەۋ قاجەت. ەل ىشىندە ىرىتكى سالماۋ ءۇشىن جەلىدە تاراپ جاتقان اقپاراتتاردى سارالاعان ءجون. تەك رەسمي دەرەكتەرگە سۇيەنىپ، فەيك اقپاراتتاردان اۋلاق بولعانىمىز دۇرىس»، - دەدى ول.