بۇرىن اۋداندىق ءماسليحات، قالالىق ءماسليحاتتار پارتيالىق تىزىممەن سايلاناتىن بولسا، الداعى سايلاۋدا ولاردىڭ بارلىعى جەكەلەگەن ازاماتتاردىڭ سايلاۋعا ءتۇسۋىن قامتاماسىز ەتەدى. ياعني پارتيالار ەمەس، جەكە تۇلعالار ءوز اۋدانىنىڭ، ءوز قالاسىنىڭ ءماسليحاتىنا وكرۋگ بويىنشا سايلاۋعا تۇسەدى. ال سايلاۋشىلار ءوزىنىڭ دەپۋتاتىنىڭ كىم ەكەنىن جاقسى بىلەتىن بولادى. پارلامەنتتە ءبىرىنشى وقىلىمدا قابىلدانعان زاڭعا نازار اۋدارساڭىز، ىشىندە «يمپەراتيۆتى ماندات» ۇعىمى پايدا بولدى. دەمەك، دەپۋتات ءوز سايلاۋشىلارى الدىندا تىكەلەي جاۋاپ بەرەدى، سايلاۋشىلاردىڭ سول دەپۋتاتقا كوڭىلى تولماسا، سايلاۋشىلارمەن ارالاسپاي كەتسە، ونى قايتا شاقىرۋ مۇمكىندىگى زاڭدا قاراستىرىلعان.

سونىمەن بىرگە وبلىستار مەن ءۇش مەگاپوليستىڭ ءماسليحاتتارى ءماجىلىس سياقتى ارالاس جولمەن سايلانادى. ولاردىڭ بەلگىلى ءبىر بولىگى پارتيالىق تىزىممەن سايلانادى، وسىعان قاراپ وبلىس حالقىنىڭ قانداي پارتيالاردى قالايتىنىن تۇسىنۋگە بولادى.

ساياسي پارتيالارعا تىركەلمەگەن، حالىقتىڭ اراسىنان شىققان ازاماتتار دا بيلىك ىسىنە ارالاسۋعا مۇمكىندىك الادى. سوندىقتان بيىل وبلىس جانە مەگاپوليس اكىمدەرىنەن باسقا اكىمدەردىڭ 99 پايىزى سايلانادى. بۇل بيلىكتى حالىققا جاقىنداتادى، جەرگىلىكتى بيلىكتىڭ، جالپى ءوزىن-وزى باسقارۋ جۇيەسىنىڭ بولمىسى مەن تابيعاتىن وزگەرتەدى. كەي وبلىس نەمەسە مەگاپوليس اكىمدەرى قازىرگىدەي «جەرگىلىكتى قۇداي» بولمايدى. ونىڭ استىنداعى بۇكىل بيلىك تارماعى سايلانعان، ياعني سايلاۋشىلاردىڭ ءۇمىتىن، ويىن، باعدارلاماسىن ىسكە اسىرۋشى بولادى. ياعني، وبلىس اكىمىنىڭ نەمەسە مەگاپوليس اكىمىنىڭ فۋنكسيونالى وزگەرەدى، ول نەگىزىنەن پرەزيدەنتتىڭ نەمەسە ۇكىمەتتىڭ جەرگىلىكتى جەردەگى وكىلى، رەسپۋبليكالىق زاڭنامانى ىسكە اسىرۋشى، قاداعالاۋشى جانە رەسپۋبليكالىق بيۋدجەتتەن كەلەتىن سۋبسيديالاردى، باعدارلامالاردى ورىنداۋشى، سونى ۇيلەستىرۋشى بولادى.

جەر ماسەلەسىن الىپ قاراساق، كوپتەگەن جاعدايدا جەرگىلىكتى جەرلەردى جەكەشەلەندىرۋگە كومەكتەسكەندەر – اۋدان اكىمدەرى. ال اۋىل اكىمدەرىنىڭ شابىندىق جەرلەردىڭ كارتاسىن جاساۋعا، يگەرلىمەي جاتقان جەرلەردى قايتارۋعا قۇلقى جوق. ويتكەنى ەشكىم باسشىسىمەن تايتالاسقا تۇسكىسى كەلمەيدى. سوندىقتان ساياساتتانۋشى ەلگە اكىم مەن بيۋدجەتتى قاداعالايتىن، مەملەكەتتىك باعدارلامالاردى ىسكە اسرىرۋدى تالاپ ەتەتىن، كۇشتى، ىقپالدى ءماسليحاتتار قاجەت.