ق ر اقپارات جانە قوعامدىق دامۋ ءمينيسترى ايدا بالايەۆا «Facebook» كومپانياسىنىڭ مينيسترلىكپەن بىرگە جاسالعان مالىمدەمەنى تەرىسكە شىعارۋىنا قاتىستى تۇسىنىك بەردى، دەپ حابارلايدى almaty-akshamy.kz
««Facebook» كومپانياسىنىڭ بىرىككەن مالىمدەمەنى تەرىسكە شىعارۋىنا قاتىستى بۇقارالىق اقپارات قۇرالدارىندا «Meta» («Facebook») كومپانياسىنىڭ ازيا-تىنىق مۇحيتى ايماعى بويىنشا وڭىرلىك كەڭسەسىنىڭ كوممۋنيكاسيالار جونىندەگى ديرەكتورى بەن ماككونەحي مىرزانىڭ (Ben McConaghy) تەرىسكە شىعارعان مالىمدەمەسىنە بايلانىستى قازاقستان رەسپۋبليكاسى اقپارات جانە قوعامدىق دامۋ مينيسترلىگى كەلەسىنى حابارلايدى.
اقپارات جانە قوعامدىق دامۋ مينيسترلىگى نەگىزگى كەلىسسوزدەردى گونكونگ قالاسىندا ورنالاسقان جۇڭگو، موڭعوليا جانە ورتالىق ازيا ءوڭىرى بويىنشا «Meta» («Facebook») كومپانياسىنىڭ وڭىرلىك وفيسىمەن جۇرگىزدى. 1 قاراشادا جاريالانعان بىرىككەن مالىمدەمەنىڭ ءماتىنى مەن ونىڭ باق-دا جاريالانۋى اتالعان ايماقتىق كەڭسەنىڭ باسشىلىعىمەن تولىقتاي كەلىسىلگەن بولاتىن»، - دەپ جازدى ا.بالايەۆا Facebook-تەگى پاراقشاسىندا.
ەسكە سالايىق، كەشە ق ر اقپارات جانە قوعامدىق دامۋ مينيسترلىگى ينتەرنەتتەگى زياندى كونتەنتكە قارسى ءىس-قيمىل ماسەلەلەرى بويىنشا Facebook-پەن تىعىز ىنتىماقتاستىق تۋرالى كەلىسىمگە كەلگەنىن ءمالىم ەتكەن بولاتىن.
«قازاقستان رەسپۋبليكاسىنىڭ ۇكىمەتىنە اقپاراتتىق كەڭىستىكتىڭ قاۋىپسىزدىگىن ارتتىرۋ ماسەلەسىن شەشۋگە كومەك كورسەتۋ ماقساتىندا Facebook قازاقستانعا ىشكى «كونتەنتتى حابارلاۋ جۇيەسىنە» («Content Reporting System» (CRS)) تىكەلەي ەكسكليۋزيۆتى قولجەتىمدىلىك بەردى. CRS مينيسترلىككە Facebook جاھاندىق كونتەنتتىك ساياساتىنىڭ دا، قازاقستان رەسپۋبليكاسىنىڭ ۇلتتىق زاڭناماسىنىڭ دا بۇزۋشىلىقتارى بار كونتەنت تۋرالى جەدەل حابارلاۋعا مۇمكىندىك بەرەدى. قازاقستان ورتالىق ازيادا كونتەنتتىك ساياساتقا جاۋاپ بەرەتىن Facebook كومپانياسىنىڭ حالىقارالىق كومانداسىمەن تىكەلەي بايلانىس ارناسىنا جانە جۇيەگە قوسىلعان العاشقى ەل بولىپ تابىلادى»، - دەلىنگەن ەدى مينيسترلىك مالىمەتىندە.