مادەنيەت جانە اقپارات ءمينيسترى ايدا بالايەۆا ەلىمىزدە كاسىپكەر رەتىندە قىزمەت ەتىپ جۇرگەن بلوگەرلەرگە ۇندەۋ جاسادى. بۇل تۋرالى مينيستر الەۋمەتتىك جەلىدە ۆيدەوۇندەۋ جاريالادى.
ايدا بالايەۆانىڭ ايتۋىنشا، وسى جىلدىڭ 10 شىلدەسىندە ەلىمىزدە ءقاۋىپسىز ونلاين ورتانى قۇرۋعا باعىتتالعان «ونلاين پلاتفورمالار جانە ونلاين جارناما تۋرالى» زاڭعا قول قويىلدى. اتالعان زاڭداعى نەگىزگى قۇقىقتىق تەتىكتەردىڭ ءبىرى - جەلىدەگى جارنامانى تاڭبالاۋ مىندەتى.
الەمنىڭ جەتەكشى ەلدەرى ونلاين جارنامانىڭ ماڭىزدى ءرولى جانە ونى منتەرنەتتە تاراتۋعا ەرەكشە ءمان بەرەدى. مىسالى، فرانسيا، بەلگيا، ۇلىبريتانيا جانە يتاليا سەكىلدى ءبىرقاتار ەلدە بلوگەرلەر قىزمەتى قۇقىقتىق اكتىلەرمەن رەتتەلەدى. بۇل ەرەجەلەر الەۋمەتتىك جەلىدەگى ماركەتينگتىڭ ارتىندا اشىقتىق مەن ادال باسەكەلەستىكتى قامتاماسىز ەتەدى. ال قازاقستاندا كوممەرسيالىق ماتەريالدارعا جارناما دەگەن بەلگى قويۋ نەگىزگى تالاپتاردىڭ ءبىرى. اۋديتوريا تاراتىلىپ وتىرعان اقپاراتتىڭ اقىلى جازىلعانىن ءبىلۋى ءتيىس.سونىمەن قاتار تامىزدا ءبىز ونلاين جارنامانى تاڭبالاۋ ەرەجەلەرىن جاريالادىق. وندا جارنامالىق ماتەريالدارعا ارناي بەلگى قويۋ مىندەتتەرى بار. سوعان سايكەس اقىلى ماتەريالدار مەملەكەتتىك نەمەسە ورىس تىلىندە ۇسىنىلاتىن نۇسقالاردىڭ بىرىمەن بەلگىلەنۋى قاجەت.
مىسالى، جارناما-رەكلاما، جارنامالىق ماتەريال – رەكلامنىي ماتەريال، سەرىكتەستىك ماتەريال- پارتنەرسكيي ماتەريال، دەمەۋشلىك ماتەريال- سپونسورسكيي ماتەريال، جارناما قۇقىعىندا – نا پراۆاح رەكلامى، دەمەۋشىمەن تولەنگەن – وپلاچەن سپونسوروم، PR قۇقىعىندا - نا پراۆاح PR دەگەن بەلگىلەرى بولۋى قاجەت. ينتەرنەتتەگى جارنامانى تاڭبالاۋ الەمدىك تاجىريبە ءۇشىن عانا قولعا الىنعان جوق. بۇل الەۋمەتتىك جەلىدەگى نارىقتىق قاتىناستار مادەنيەتىن قالىپتاستىرۋ ءۇشىن قاجەت.
مينيستر بۇل زاڭ بلوگەرلەرگە كاسىپكەرلىك كودەكسكە سايكەس اقىلى قىزمەت كورسەتۋ مىندەتتەرىن جۇكتەيتىنىن ەسكەرتتى.
«ياعني، ولار كاسىپكەر رەتىندە تىركەلىپ، سالىق تولەۋى ءتيىس. بۇگىنگى تاڭدا قۇزىرەتتى ورگاندار ماركەتينگتىك قىزمەت كورسەتەتىن بلوگەرلەردىڭ ستاتۋسىن انىقتاۋمەن اينالىسۋدا. وسى كاسىپ تۇرىمەن پايدا تاۋىپ جۇرگەن ازاماتتار ءتيىستى مەكەمەلەرگە تىركەلمەگەن جاعدايدا زاڭسىز كاسىپكەرلىك قىزمەتى ءۇشىن جاۋاپكەرشىلىك بار ەكەنىن ەسكە سالامىن. ءبىرىنشى كەزەڭدە مەملەكەتتىك كىرىستەر كوميتەتى ءىرى بلوگەرلەرگە تاۋەلسىز مونيتورينگ جۇرگىزىپ، ونىڭ نەگىزىندە باقىلاۋ جۇرگىزدى. الداعى ۋاقىتتا ءبىزدىڭ ۆەدومستۆو مەن سالىق ورگانى اراسىندا بىرلەسكەن جۇمىس ۇيىمداستىرىلادى. سونىمەن بىرگە بلوگەرلەر وزدەرىنىڭ جارناما بەرۋشىلەرىنە مۇقيات بولۋى قاجەت. ويتكەنى، الەۋمەتتىك جەلىدەگى ءار اقپارات ءۇشىن جارناما جاساۋشى تولىق جاۋاپكەرشىلىكتە بولادى. ماسەلەن، سوڭعى كەزدەرى قارجىلىق پيراميدالاردى ناسيحاتتاعانى ءۇشىن جاۋاپكەرشىلىك ايتارلىقتاي كۇشەيدى. ەندى قىلمىستىق كودەكسكە سايكەس قارجىلىق پيراميدالارعا جارناما جاساعاندارعا 2 مىڭ اەك ايىپپۇل، 600 ساعاتقا دەيىن قوعامدىق جۇمىستارعا جەگۋ نەمەسە 2 جىلعا دەيىن باس بوستاندىعىنان ايىرۋ جازاسىنا كەسىلەدى. قىلمىستىڭ اۋىرلىعىنا قاراي مۇلكى تاركىلەنىپ، 3 جىلدان 7 جىلعا دەيىن باس بوستاندىعىنان ايىرۋ قاراستىرىلعان»، - دەدى ول.
سونىمەن قاتار ايدا بالايەۆا ەلىمىزدە تەكسەرىلمەگەن اقپاراتتى تاراتقان الەۋمەتتىك جەلى قولدانۋشىسىنا دا جاۋاپكەرشىلىك قاراستىرىلعانىن ايتتى.
«قۇقىقبۇزۋشىلىقتىڭ اۋىرلىعىنا قاراي الەۋمەتتىك جەلى قولدانۋشىلارى اكىمشىلىك جاۋاپكەرشىلىككە تارتىلادى. ەگەر قۇقىقبۇزۋشىلىق ءبىر جىل ىشىندە قايتالانسا، 10 تاۋلىككە قاماۋعا الىنادى نەمەسە قىلمىستىق جاۋاپكەرشىلىككە تارتىلادى. ءبىز جالعان اقپاراتتى انىقتاۋ ءۇشىن تاۋلىك بويى مونيتورينگ جۇرگىزەمىز. ءبارىمىز قۇقىقتىق مەملەكەتتە ءومىر ءسۇرىپ جاتقانىمىزدى، قىلمىستىق جانە ازاماتتىق كودەكستى ساقتاۋ كەرەكتىگىن ۇمىتپاۋىمىز كەرەك»، - دەيدى مينيستر.