17-23 شىلدە ارالىعىندا قاراعاندى وبلىسىنىڭ «سپاسسك» وقۋ ورتالىعىندا جىل سايىنعى «ايبىن» جاستار جيىنى وتەدى، دەپ حابارلايدى Almaty-akshamy.kz.
ۆەدومستۆونىڭ اقپاراتىنا بويىنشا، وقۋ ورتالىعىنىڭ اۋماعىندا 43 كوماندادان تۇراتىن 700-دەن استام جاسوسپىرىمدەر مەن وقۋشىلار ءۇشىن شاتىرلى لاگەر اشىلعان.
ءىس-شاراعا قازاقستاننىڭ بارلىق وڭىرلەرىنەن جاستار جينالادى. وعان قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ اسكەري-پاتريوتتىق كلۋبتارىنىڭ، ساعادات نۇرماعامبەتوۆ اتىنداعى اسكەري كوللەدجدىڭ، «جاس ۇلان» رەسپۋبليكالىق مەكتەپتەرىنىڭ، كونكۋرستىق ىرىكتەۋدەن وتكەن وبلىستىق اسكەري مەكتەپ-ينتەرناتتاردىڭ تاربيەلەنۋشىلەرى قاتىسادى. بيىلعى جيىنعا العاش رەت ازەربايجان مەن وزبەكستاننىڭ كوماندالارى شاقىرىلىپ وتىر. بايقاۋعا 14-17 جاس ارالىعىنداعى بالالار قاتىسادى.
بايقاۋ باعدارلاماسىندا «ايبىن دارىنى» زياتكەرلىك ويىنى جانە «كۇشىمىز – بىرلىكتە» اسكەري-دالالىق تاكتيكالىق ويىنى، «ايبىن جۇلدىزى» شىعارماشىلىق بايقاۋى جانە Smart Sarbaz روبوتوتەحنيكا سايىسى بار. اسكەري-سپورتتىق، اسكەري-قولدانبالى سپورت تۇرلەرى جانە اسكەريلەندىرىلگەن ەستافەتا بويىنشا جارىستار وتكىزۋ ءۇشىن الاڭدار دايىندالدى.
جيىندا اسكەري تەحنيكا كورمەسى، فيلمدەر كورسەتىلىمى، مۇراجايدىڭ كوشپەلى ەكسپوزيسياسى ۇيىمداستىرىلادى. بالالاردى سپورتتىق ويىندار، الاۋ جانىنداعى كەشتەر مەن ينتەراكتيۆتى كونسەرت كۇتەدى. بايقاۋعا قاتىسۋشىلار «ايبىن – دوستىق مەكەنى» ساياباعىنا اعاش وتىرعىزادى. تانىمال ادامدارمەن، ارداگەرلەرمەن، مەديا تۇلعالارمەن كەزدەسۋلەر وتەدى.
«ايبىن» حالىقارالىق جيىنى اياسىندا «بىرلىك ورداسى» كورمەسى ۇيىمداستىرىلادى. وندا قازاقستان، ازەربايجان جانە وزبەكستاننىڭ جاس پاتريوتتارى ءوز حالقىنىڭ مادەني جەتىستىكتەرىن، ۇزدىك داستۇرلەرى مەن ادەت-عۇرىپتارىن كورسەتەتىن بولادى.