قازاقستاندا اسفالتتى سۋىق اۋا رايىندا توسەيدى: جاڭا تەحنولوگيا سىناقتان وتۋدە
بۇل جاڭا تەحنولوگيا رەسپۋبليكاندىق ماڭىزى بار جولداردا سىناقتان وتۋدە، دەپ حابارلايدى aqshamnews.kz ق ر يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
جاڭا «جىلى اسفالت» تەحنولوگياسى جول جۇمىسشىلارىنا اسفالتبەتون قوسپاسىن توسەۋ كەزىندە تەمپەراتۋرا تالاپتارىنا وزگەرىستەر ەنگىزىلىپ، ەركىندىك بەرىلە باستادى. بۇرىن اسفالت قوسپاسىن توسەۋ ءۇشىن ونىڭ تەمپەراتۋراسى 125–130 گرادۋس ارالىعىندا، ال اۋا تەمپەراتۋراسى كەمىندە +5°C بولۋى كەرەك ەدى. ەندى عالىمدار 90°C تەمپەراتۋرادا قوسپا ازىرلەۋگە جانە اۋا تەمپەراتۋراسى −10°C-كە دەيىن تومەندەگەندە دە اسفالت توسەۋگە مۇمكىندىك بەرەتىن ارنايى قوسپا ازىرلەدى.
بۇل شەشىم اسىرەسە رەسپۋبليكانىڭ سولتۇستىك ايماقتارى ءۇشىن ماڭىزدى، ويتكەنى وندا قۇرىلىس ماۋسىمى 3–4 اي عانا جۇرگىزىلەدى. جاڭا تەحنولوگيا اسفالتتىڭ بەرىكتىگىن ارتتىرىپ، اسفالت وندىرۋگە جۇمسالاتىن ەنەرگيا شىعىندارىن ازايتۋعا جانە قورشاعان ورتاعا اسەرىن تومەندەتۋگە كومەكتەسەدى.
قازىرگى ۋاقىتتا «جىلى اسفالت» تەحنولوگياسى الماتى وبلىسىنداعى رەسپۋبليكالىق ماڭىزى بار كۇرتى — بۇرىلبايتال جولىندا سىناقتان وتۋدە.
بۇل باستاما قازاقستانداعى ينفراقۇرىلىمدىق ماسەلەلەردى شەشۋگە باعىتتالعان بىرنەشە جوبانىڭ ءبىرى بولىپ تابىلادى. سوڭعى ۋاقىتتا الەۋمەتتىك جەلىلەردە «جولسىز ەل — سالىقسىز ەل» اتتى چەللەندج اياسىندا جەرگىلىكتى تۇرعىندار ءوز ايماقتارىنداعى جولداردىڭ جاعدايى تۋرالى كوپتەپ اقپارات جىبەرگەن. بۇعان دەيىن قاسىم-جومارت توقايەۆ ينفراقۇرىلىم ماسەلەلەرىنىڭ شەشىلمەۋىنە نەگىزگى سەبەپتەردىڭ ءبىرى رەتىندە سىبايلاس جەمقورلىقتى اتاعان بولاتىن.