اياق كيىمدى مىندەتتى سيفرلىق تاڭبالاۋ نە ءۇشىن قاجەت؟

مىندەتتى سيفرلىق تاڭبالاۋ ءونىمنىڭ كولەڭكەلى ساۋداسىن ازايتۋ ماقساتىندا جاسالادى.

 ءبىزدىڭ ەلىمىزدە مىندەتتى سيفرلىق تاڭبالاۋ العاش رەت اياق كيىم سالاسىنا ەنگىزىلەيىن دەپ وتىر، دەپ حابارلايدى Almaty-akshamy.kz ءتىلشىسى.

 ق ر ءييدم-نىڭ مالىمەتىنشە، قازاقستاندا اياق كيىمدى مىندەتتى سيفرلىق تاڭبالاۋ بيىل 1 قاراشادان باستاپ ەنگىزىلەتىن بولادى. ياعني وسى ۋاقىتتان باستاپ تاڭبالانباعان اياق كيىمنىڭ وندىرىسىنە جانە ونىڭ ەلىمىزدىڭ اۋماعىنا اكەلىنۋىنە تىيىم سالىنادى. ال بولشەك ساۋداداعى تاڭبالانباعان تاۋارلاردىڭ قالدىقتارىن ساتىپ ءبىتىرۋ ءۇشىن قوسىمشا تاعى ءبىر جىل ۋاقىت بەرىلەدى.

 ەلىمىزدىڭ اياق كيىم وندىرۋشىلەرى مەن يمپورتتاۋشىلار تاڭبالاۋ جۇيەسىندە (markirovka.kz) تىركەلۋ كەرەك. تاڭبالاۋ كودتارىن شىعارۋ ءۇشىن جۇيەگە وندىرىلەتىن جانە يمپورتتالاتىن ءونىم تۋرالى اقپاراتتى ەنگىزۋ قاجەت. ءبىر تاڭبالاۋ كودىنىڭ باعاسى 2،68 تەڭگە تۇرادى.

 قازاقستاندا قازىرگى ۋاقىتتاعى اياق كيىم تاۋارلارى اينالىمىنىڭ 96% - يمپورتقا، 4% - ىشكى وندىرىسكە تيەسىلى. اياق كيىم ىشكى نارىعىنىڭ دامۋىن كولەڭكەلى اينالىم ايتارلىقتاي شەكتەپ وتىر.

 ايتا كەتەتىن بولساق، تاۋارلاردى سيفرلىق تاڭبالاۋ – بۇل ەاەو دەڭگەيىندە جۇزەگە اسىرىلاتىن ۇلتارالىق جوبا. ەلىمىزدىڭ مەملەكەتتىك كىرىستەر كوميتەتىنىڭ دەرەكتەرى بويىنشا، اياق كيىمنىڭ كولەڭكەلى نارىعى جالپى كولەمنىڭ شامامەن 48،5%ء-ىن قۇرايدى. مىندەتتى تاڭبالاۋدىڭ ارقاسىندا بۇل كورسەتكىشتى تومەندەتۋگە مۇمكىندىك بار. ال تۇتىنۋشىلار Naqty Onim ءموبيلدى قوسىمشاسى ارقىلى تاڭبالانعان تاۋاردىڭ ءتۇپنۇسقالىعىن وڭاي تەكسەرە الادى.