دارىگەرلەر ونىڭ وڭ اياعىنىڭ بىرنەشە جەرىنە تەمىر سالىپ، وتا جاساعان
الماتى قالاسىنىڭ مەدەۋ اۋداندىق پوليسيا ءبولىمىنىڭ ۋچاسكەلىك پوليسيا قىزمەتكەرى ۇلان وحانوۆ 31 ارنانىڭ “ينفورمبيۋرو” اقپاراتتىق باعدارلاماسىنىڭ تىلشىلەرىنە سۇحبات بەردى، دەپ حابارلايدى Almaty-akshamy.kz.
ول قالاداعى تولە بي مەن بايتۇرسىنوۆ كوشەلەرىنىڭ قيىلىسىندا ادامداردى قۋىپ ءجۇرىپ قاققان كولىكتەن زارداپ شەگىپ، اياۋسىز سوققىعا جىعىلعان.
ۇلان وحانوۆتىڭ ايتۋىنشا، قۇقىق قورعاۋ قىزمەتكەرلەرى ارت جاقتان كەلگەن اسكەري كولىكتى كومەككە كەلگەن ارىپتەستەرى ەكەن دەپ ويلاعان.
«الىستان قاراعاندا كولىك تىزگىنىندە قارا كيىم كيگەن ادام وتىرعانىن كورىپ، ءوز قىزمەتكەرىمىز دەپ ويلادىق. سوققىدان ۇشىپ كەتتىم. تۇرايىن دەسەم، توبىعىم تايىپ كەتكەن ەكەن، اياعىمدى كورىپ، تالىپ قالدىم»، – دەيدى ۇلان وحانوۆ.
وسىدان كەيىن ۇلاندى ارىپتەس ەكى دوسى جولدىڭ شەتىنە شىعارىپ، اعاشقا سۇيەگەن.
«تاستاپ كەتىڭدەر، جۇرۋگە شامام جوق» دەپ ايتىپ ۇلگەردىم. تاعى ءبىر ەسىمدى جيعاندا بايقاعانىم، فورمامنان سۇيرەگەن الدەكىمدەر سول ماڭدا ورنالاسقان «حالىق بانك» عيماراتىنىڭ ىشىنە قاراي اپارا جاتىر ەكەن. ول جاقتا پوليسيا قىزمەتكەرلەرى مەن اسكەريلەردى جابىلىپ ۇرىپ جاتتى. «كيىمىڭدى شەش» دەپ جاتقانىن، ءبىر ۇلكەن كىسىنىڭ «قازاقتىڭ بالاسى عوي، تيىسپەڭدەر» دەپ جۇگىرىپ، جىلاپ جۇرگەنىن كوردىم. ءبىراق ونى ۇلكەن كىسى دەپ تىڭداپ جاتقان ەشكىم جوق»، – دەپ ەسىنە الدى پوليسيا قىزمەتكەرى.
ۇلان وحانوۆ سوققىدان ەسىنەن تانىپ، اۋرۋحانادا عانا وز-وزىنە كەلگەن. دارىگەرلەر ونىڭ وڭ اياعىنىڭ بىرنەشە جەرىنە تەمىر سالىپ، وتا جاساعان. وعان قوسا ميى شايقالىپ، سول قولىنان جاراقات العانىن ايتتى. ول اۋراحانادا جاتقان 15 كۇندە 15 كەلى سالماق جوعالتقان. ۇلان ءوزىن ەمدەۋ مەكەمەسىنە اپارعان بەلگىسىز ازاماتقا العىسىن ءبىلدىردى.
ءىىم تەرگەۋ دەپارتامەنتىنىڭ ءتوراعاسى سانجار ءادىلوۆتىڭ ايتۋىنشا، قاڭتار وقيعاسى كەزىندە جالپى سانى 3 مىڭنان استام اسكەري، قۇقىق قورعاۋ سالاسىنىڭ قىزمەتكەرلەرى ءتۇرلى جاراقاتتارمەن اۋرۋحاناعا تۇسكەن.
«ولاردىڭ كەيبىرى قىزمەتىنە ورالا المايدى، مۇگەدەك بولىپ قالدى»، – دەدى ءىىم تەرگەۋ دەپارتامەنتىنىڭ ءتوراعاسى.