«احمەت بايتۇرسىن ۇلى» توسبەلگىسىن دايىنداۋ تاپسىرىلدى
قازاقستان رەسپۋبليكاسىنىڭ مەملەكەتتىك كەڭەسشىسى ەرلان ءقاريننىڭ توراعالىعىمەن ۇلت ۇستازى، «الاش» قوزعالىسىنىڭ قايراتكەرى احمەت بايتۇرسىن ۇلىنىڭ 150 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ وتىرىسى ءوتتى، دەپ حابارلايدى Almaty-akshamy.kz اقورداعا سىلتەمە جاساپ.
وتىرىستا مەملەكەتتىك ورگانداردىڭ باسشىلارى مەرەيتوي اياسىندا اتقارىلىپ جاتقان عىلىمي-زەرتتەۋ، اعارتۋشىلىق، مادەني-بۇقارالىق باعىتتاعى جۇمىستار جايىندا باياندادى.
ق ر عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسىنىڭ جارلىعىنا سايكەس قازاقستان رەسپۋبليكاسىنىڭ احمەت بايتۇرسىن ۇلى اتىنداعى گۋمانيتارلىق عىلىمدار سالاسىنداعى مەملەكەتتىك سىيلىعى تاعايىندالعانىن اتاپ ءوتتى. سونىمەن قاتار ول يۋنەسكو-نىڭ پاريج قالاسىنداعى شتاب-پاتەرىندە احمەت بايتۇرسىن ۇلىنىڭ 150 جىلدىق مەرەيتويىنا ارنالعان عىلىمي كونفەرەنسيا وتكەنىن، وندا «احمەت بايتۇرسىن ۇلى. تاڭدامالى شىعارمالارى» (قازاق، اعىلشىن، ورىس، تۇرىك تىلدەرىندە) كىتابىنىڭ تۇساۋى كەسىلگەنىن ايتتى. بۇدان بولەك بيىل تۇركسوي ۇيىمى حالىقارالىق دەڭگەيدەگى عالىمدار مەن زەرتتەۋشىلەرگە جىل سايىن احمەت بايتۇرسىن ۇلى اتىنداعى توسبەلگى تاعايىنداعانىن جانە الماتى قالاسىندا ۇلت ۇستازىنىڭ ەسكەرتكىشى اشىلاتىنىن جەتكىزدى.
ق ر مادەنيەت جانە سپورت ۆيسە-مينيسترى نۇرعيسا داۋەشوۆ احمەت بايتۇرسىن ۇلىنىڭ ءومىرى مەن قايراتكەرلىگىنە ارنالعان «سوڭعى ۇكىم» كينوجوباسىنىڭ ءتۇسىرىلىمى جىل اياعىنا دەيىن اياقتالاتىنىن، جەلتوقسان ايىندا مەرەيتويعا ارنالعان رەسپۋبليكالىق ايتىس وتكىزىلەتىنىن اتاپ ءوتتى.
قوستاناي وبلىسىنىڭ اكىمى ارحيمەد مۇحامبەتوۆ تورعاي وڭىرىندە احمەت بايتۇرسىن ۇلى مەن ءمىرجاقىپ دۋلات ۇلىنىڭ ەسكەرتكىشى اشىلعانىن، قوستاناي وبلىسىنداعى احمەت بايتۇرسىن ۇلى مەن ءمىرجاقىپ دۋلات ۇلىنىڭ ادەبي مۇراجايىنا اباتتاندىرۋ جۇمىستارى جۇرگىزىلگەنىن ايتتى.
وتىرىستى قورىتىندىلاي كەلە، مەملەكەتتىك كەڭەسشى ەرلان قارين احمەت بايتۇرسىن ۇلىنىڭ مۇراسىن ناسيحاتتاۋعا باعىتتالعان ءىس-شارالاردى جىل سوڭىنا دەيىن جوعارى دەڭگەيدە وتكىزۋ قاجەت ەكەنىنە توقتالدى. سونداي-اق تۇركىستان قالاسىندا حالىقارالىق تۇركىتانۋشىلار كونگرەسىن ۇيىمداستىرۋدى، ۇلت ۇستازىنىڭ 12 تومدىق شىعارمالارىنىڭ جيناعىن شىعارۋدى، «احمەت بايتۇرسىن ۇلى» توسبەلگىسىن دايىنداۋ جۇمىستارىن جۇرگىزۋدى تاپسىردى.