5 قىركۇيەك – قازاقستان حالقى تىلدەر كۇنى. بۇل كۇن ەلىمىزدە تۇراتىن ءتۇرلى ەتنوس وكىلدەرىنىڭ مادەنيەتى مەن تىلىنە دەگەن قۇرمەت بەلگىسى رەتىندە اتاپ وتىلەتىن مەرەكە. سونىمەن قاتار، ءدال وسى كۇنى قازاقتىڭ كورنەكتى اقىنى، ادەبيەت زەرتتەۋشىسى، عالىم، تۇركىتانۋشى، پۋبليسيست، پەداگوگ، اۋدارماشى، قوعام قايراتكەرى احمەت بايتۇرسىن ۇلىنىڭ تۋعان كۇنى تويلانادى.
احمەت اتامىزداي تۇلعالار ءبىر عاسىردا ءبىر تۋاتىن اسىل ازاماتتار دەسەم، قاتەلەسپەيمىن. ول قازاق حالقىنىڭ ەرتەڭىن ويلاپ، ءتىلىمىز بەن ءدىلىمىزدىڭ جوعالماۋىن قالاعان تۇلعا. قازاق حالقى ءۇشىن اتقارعان ەڭبەگى ۇشان-تەڭىز.
قازۇۋ-دىڭ ءبىرىنشى كۋرس ستۋدەنتى جانە بولاشاق ءتىل مامانى رەتىندە احمەت بايتۇرسىن ۇلى اتىنداعى مۇراجايعا جانە ونىڭ ەسكەرتكىشىنە گۇل شوقتارىن قويۋعا باردىق. بۇل ساپار وتە اسەرلى ءارى تاعىلىمدى بولدى. قازاقستان تاريحىنا، تاۋەلسىزدىك جولىنداعى كۇرەسكەرلەردىڭ ەرلىكتەرىنە جانە مادەني مۇراعا قىزىعاتىن جاندار ءۇشىن مۇراجايدىڭ ماڭىزى زور. احمەت بايتۇرسىن ۇلى مۇراجايى كورنەكتى كوشباسشىنىڭ ءومىرى مەن قىزمەتى ارقىلى وتانىمىزدىڭ تاريحىمەن تەرەڭىرەك تانىسۋعا مۇمكىندىك بەرەدى. ونىڭ جەكە زاتتارى، ءوز قولىمەن قولدانعان جولساندىعى، ساماۋرىنى جانە قۇجاتتارى ەرەكشە نازار اۋدارتادى.
مەن ءۇشىن ەڭ قىزىقتىسى – احمەت اتامىزدىڭ جازۋى بولدى. جازۋى سونشالىقتى كوركەم، ءتىپتى كالليگرافيا ونەرىمەن شۇعىلدانعانداي كورىندى. الاش ارىسىنىڭ بارلىق ءىسى مىنسىزدەي كورىنەدى! مەن ءۇشىن احمەت اتامىز – ءمىنسىز ادام. ونىڭ اقىل-پاراساتى، ەلگە ادال قىزمەت ەتۋى، زيالىلارمەن بىرگە ەلىنىڭ بولاشاعى ءۇشىن كۇرەسۋى ماقتانارلىق قاسيەتتەر.
تاعى ءبىر قىزىق دەرەك – احمەت بايتۇرسىن ۇلىنىڭ وتباسى 1933-1937 جىلدارى وسى ۇيدە تۇرعانى ايتىلادى. 1988 جىلى ول اقتالعاننان كەيىن، بۇل عيمارات تاريح جانە ساۋلەت ەسكەرتكىشى رەتىندە تانىلىپ، 1993 جىلى مۇراجاي رەتىندە اشىلدى. احمەت اتامىزدىڭ ەلى ءۇشىن اتقارعان ىستەرىنىڭ ءبىرى – 1917 جىلعى ريەۆوليۋسيا كەزىندە قازاق حالقىنىڭ ۇلتتىق مۇددەسىن قورعاپ، الاش قايراتكەرلەرىنىڭ توبىن باسقارعانى. ول قازاقتىڭ رۋحاني كوشباسشىسى بولدى.
احمەت بايتۇرسىن ۇلى – ۇلت بولاشاعىن ويلاعان دانا، دارا تۇلعا. ونى ۇمىتپاۋ، ءارى قاراي دارىپتەۋ – ءبىزدىڭ مىندەتىمىز. مۇنى ءاردايىم ەستە ساقتاۋىمىز كەرەك.
قۋانىش قىزى جادىرا، ءال-فارابي اتىنداعى قازۇۋ، فيلولوگيا فاكۋلتەتىنىڭ1 كۋرس ستۋدەنتى.
سىمبات يگىلىك قىزى، PhD، ءال-فارابي اتىنداعى قازۇۋ-دىڭ اعا وقىتۋشىسى