جۋىردا الەۋمەتتىك جەلىدە الماتى قالاسىنىڭ ورتالىق كوشەلەرىنىڭ بىرىندە پاترۋلدىك پوليسيا قىزمەتكەرىنىڭ موپەد ايداعان شەتەلدىك ازاماتپەن اعىلشىن تىلىندە سويلەسكەن ۆيدەوسى تارادى. كوپشىلىك بۇل ءساتتى ەرەكشە جىلى قابىلداپ، ءتارتىپ ساقشىسىنىڭ بىلىكتىلىگى مەن سىپايىلىعىنا جوعارى باعا بەردى. بۇل وقيعانىڭ ءمان-جايىن Aqshamnews.kz ءتىلشىسى انىقتاپ كوردى.
بەينەجازبادا پوليسيا كاپيتانى ءوزىن قىزمەتتىك ەتيكەتكە ساي تانىستىرىپ:
– ساۋلىعىڭىزدى تىلەيمىن، پوليسيا كاپيتانى سەيسەنبايەۆ، – دەپ شەتەلدىك ازاماتقا جاقىندايدى. الايدا موپەد جۇرگىزۋشىسى:
– Sorry! I don’t speak Russian، – دەپ، ورىس تىلىندە سويلەي المايتىنىن جەتكىزەدى.
پوليسيا قىزمەتكەرى ەش توسىلماي، اعىلشىن تىلىندە ەركىن ديالوگ قۇرىپ كەتەدى. تۋريست ءوزىن الەكس دەپ تانىستىرىپ، يتاليالىق ەكەنىن، اۆستراليادان كەلە جاتقانىن جانە 10 شاقتى ەلدى ارالاعانىن ايتىپ بەرەدى. الداعى باعىتى – رەسەي ەكەن.
– ءبىزدىڭ ەلىمىز تۋرالى نە ويلايسىز؟ – دەگەن سۇراققا شەتەلدىك:
– وتە ادەمى، ماعان بۇل مەملەكەت ۇنايدى، – دەپ جاۋاپ بەرەدى.
كاپيتان سەيسەنبايەۆ وعان قاجەتتى جاعدايدا «102» نومىرىنە حابارلاسۋعا بولاتىنىن ايتىپ، قوشتاسادى. اعىلشىن تىلىندە ەركىن سويلەگەن پوليسيا قىزمەتكەرى بۇل ارەكەتى ارقىلى سىپايىلىقتىڭ دا ۇلگىسىن دە تانىتقانداي.
ۆيدەو الەۋمەتتىك جەلىدە كەڭىنەن تاراپ، جەلى قولدانۋشىلارى بۇل كورىنىسكە تامسانا پىكىر قالدىردى:
«جارايسىڭ! جىگىتكە جەتى ونەر دە از»،
«باسقا پلانەتانىڭ پوليسەيى شىعار)))»،
«قازاقستاندا دا وسىنداي قىزمەتكەر بار ەكەنىنە سەنگىم كەلەدى»،
«ارنايى تۇسىرىلگەن شىعار»،
«جارايسىڭ! مەكتەپتە اعىلشىن ءتىلىن جاقسى وقىعان عوي دەيمىن» – دەپ جارىسا جازدى قولدانۋشىلار.
بۇل جاعدايدىڭ انىق-قانىعىن ءبىلۋ ماقساتىندا ءبىز پوليسيا كاپيتانى نۇربولسىن سەيسەنبايەۆقا حابارلاستىق. ول وقيعانىڭ شىنايى ەكەنىن راستادى. اعىلشىن ءتىلىن قايدان مەڭگەرگەنىن سۇرايىق دەگەنىمىزدە:
– جۇمىس بارىسىندا كەز كەلگەن جاعداي بولۋى مۇمكىن. ءقازىر قىزمەت بارىسىندامىن، ۋاقىتىم تىعىز، – دەپ قىسقا قايىردى.
قالاي بولعاندا دا، بۇل وقيعا – پوليسيا يميدجىنە وڭ اسەر ەتىپ، حالىقتىڭ سەنىمىن ارتتىرعان جارقىن مىسالعا اينالدى.