بۇل سوماعا «اگرارلىق نەسيە كورپوراسياسى» اق-نىڭ 400 ملرد تەڭگەسى مەن ونىڭ ەنشىلەس ۇيىمى - «قازاگروقارجى» اق-نىڭ 151،7 ملرد تەڭگە كىرەدى.
«بايتەرەك» حولدينگىنىڭ ەنشىلەس ۇيىمى اگرارلىق نەسيە كورپوراسياسى اگروونەركاسىپ كەشەندى قارجىلاندىرۋ بويىنشا 400 ميللياردتىق مەجەدەن ءوتتى، دەپ حابارلايدى aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
وتكەن جىلدىڭ سايكەس كەزەڭىمەن سالىستىرعاندا ناقتى قارجىلاندىرۋ كولەمى 164 ملرد تەڭگەدەن استى.
اتالعان سومانىڭ 320 ملرد تەڭگەدەن استامى «كەڭ دالا» جانە «كەڭ دالا 2» باعدارلامالارى بويىنشا كوكتەمگى ەگىن ەگۋ جانە كۇزگى جيىن-تەرىم جۇمىستارىن قارجىلاندىرۋعا، ال 80 ملرد تەڭگەسى «اگروبيزنەس» باعدارلاماسىنا ءبولىندى.
بۇل وتكەن جىلعى كورسەتكىشتەن ەكى ەسە كوپ.
كورپوراسيا قارجىلاندىرۋ ارنالارىن ۇلعايتا وتىرىپ، فەرمەرلەر ءۇشىن بارىنشا قولايلى جاعدايلار جاسادى. سونىڭ ناتيجەسىندە نەسيەنى كورپوراسيا فيليالدارىنان كرەديتتىك سەرىكتەستىكتەر، ەكىنشى دەڭگەيلى بانكتەر، الەۋمەتتىك-كاسىپكەرلىك كورپوراسيالار (اكك) جانە ميكروقارجى ۇيىمدارى ارقىلى الۋعا بولادى.
«وتكەن جىلى اگرارلىق نەسيە كورپوراسياسى مەن قازاگروقارجىنىڭ قارجىلاندىرۋ كولەمى 554،7 ملرد تەڭگەنى قۇراپ، ءابسوليۋتتى تاريحي جوعارى كورسەتكىشكە جەتتى. بيىلعى كورسەتكىش ودان دا جوعارى بولادى. ءبىز جىل سوڭىنا دەيىن جالپى سوما 700 ملرد تەڭگەدەن اسادى دەپ جوسپارلاپ وتىرمىز. كوڭىل قۋانتاتىنى – ەلىمىزدەگى ءاربىر ءۇشىنشى اۋىل شارۋاشىلىعى تاۋارىن ءوندىرۋشى ءبىزدىڭ كليەنتىمىز. وتكەن جىلدىڭ قورىتىندىسى بويىنشا سوڭعى قارىز الۋشىلار سانى 85 مىڭنان استى. ءبىز كليەنتتەرمەن دۇرىس جۇمىس ىستەۋگە ەرەكشە كوڭىل بولەمىز. ولاردىڭ نەسيە الۋلارىنا جانە اۋىل شارۋاشىلىعىن دامىتۋلارىنا قولداۋ كورسەتۋ ءۇشىن بارىنشا قولايلى جاعدايلار جاساۋعا تىرىسامىز»، - دەپ اتاپ ءوتتى «اگرارلىق نەسيە كورپوراسياسى» اق باسقارما ءتوراعاسى المات اشىربەكوۆ.
ەستەرىڭىزگە سالا كەتەيىك، بيىل كوكتەمدە ەگىن ەگۋ جانە كۇزگى جيىن تەرىم جۇمىستارىن جۇرگىزۋ ءۇشىن اگرارلىق نەسيە كورپوراسياسىنىڭ جاڭا «كەڭ دالا 2» باعدارلاماسى ىسكە قوسىلدى.
«بۇل قارجى رەسۋرستارى جەكە كاپيتال نارىعىنان تارتىلادى، بۇل رەتتە قارىز الۋشىلار ءۇشىن جىلدىق سىياقى مولشەرلەمەسى جەڭىلدەتىلگەن 5% مولشەرىندە بەكىتىلدى. بيىل كەپىل مۇلكى جەتپەيتىن فەرمەرلەر ءۇشىن العاش رەت «دامۋ» قورى قارىز سوماسىنىڭ 85%-ىن كەپىلدەندىرەتىن بولدى. ءوتىنىم تەك اگرارلىق نەسيە كورپوراسياسىنا بەرىلەدى، ودان ءارى كورپوراسيا كەپىلدىك الۋ ءۇشىن قورعا ءوتىنىمدى ءوزى جىبەرەدى»، - دەپ ءتۇسىندىردى كورپوراسيانىڭ باسقارما ءتوراعاسى.
2،2 مىڭنان استام فەرمەردى قامتىعان «اگروبيزنەس» امبەباپ باعدارلاماسى بەلسەندى تۇردە ىسكە اسىرىلۋدا. بيىل مال شارۋاشىلىعىن، وسىمدىك شارۋاشىلىعىن دامىتۋ جانە اۋىل شارۋاشىلىعى ونىمدەرىن قايتا وڭدەۋ جوبالارىنا شامامەن 80 ملرد تەڭگە ءبولىندى.
بۇدان بولەك 16 ينۆەستيسيالىق جوبا پايدالانۋعا بەرىلدى. ولاردىڭ قاتارىندا سۋارۋ جۇيەلەرى، وڭدەۋ، كوكونىس جانە جەمىس ساقتاۋ قويمالارى، تاۋارلى سۇتفەرمالارى، قۇس فابريكالارى، جىلىجايلار مەن باقتار بار.
قازاگروقارجى جىلدىق سىياقى مولشەرلەمەسى 5% بولاتىن جەڭىلدەتىلگەن ليزينگتى ىسكە قوستى. باعدارلاما وتاندىق وندىرۋشىلەردىڭ اۋىل شارۋاشىلىعى تەحنيكاسىن ساتىپ الۋ ءۇشىن 7 جىلعا دەيىنگى مەرزىمگە قارجىلاندىرادى. قازىرگى ۋاقىتتا قازاگروقارجى وسى باعدارلاما بويىنشا 67،4 ملرد تەڭگەگە 1،6 مىڭنان استام اۋىل شارۋاشىلىعى تاۋارىن وندىرۋشىلەردى قارجىلاندىردى، بۇل 2،6 مىڭنان استام تەحنيكا ساتىپ الۋعا مۇمكىندىك بەردى.