اگرارلىق نەسيە كورپوراسياسى "كەڭ دالا" باعدارلاماسى بويىنشا اۋىل شارۋاشىلىعى تاۋار وندىرۋشىلەرى مەن اگروونەركاسىپتىك كەشەن سۋبەكتىلەرىن كوكتەمگى ەگىس جانە ەگىن جيناۋ جۇمىستارىنا قارجىلاندىرۋدى جالعاستىرۋدا، دەپ حابارلايدى اlmaty-akshamy.kz.
بۇعان دەيىن جوسپارلانعان 70 ميلليارد تەڭگەگە قوسىمشا تاعى 70 ميلليارد تەڭگە بولىنەدى. مەملەكەت باسشىسى ق.توقايەۆ 2022 جىلعى ناۋرىزداعى "جاڭا قازاقستان: جاڭارۋ جانە جاڭعىرۋ جولى" اتتى قازاقستان حالقىنا جولداۋىندا اتاپ وتكەندەي، قازىرگى توتەنشە تۇراقسىز حالىقارالىق جاعدايدا ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋدىڭ ماڭىزى زور.
ەگىس ناۋقانىنىڭ ساپاسى ءبىرىنشى ورىندا تۇر، ونداعى نەگىزگى ماسەلە - ەگىنشىلەردى نەسيەلىك قاراجاتپەن قامتاماسىز ەتۋ. جىل سايىن كورپوراسيا قىسقا مەرزىمدى بيۋدجەتتىك نەسيە تارتۋ ارقىلى شارۋالاردى كوكتەمگى ەگىس جانە ەگىن جيناۋ جۇمىستارىنا 70 ملرد تەڭگە كولەمىندە قارجىلاندىرادى.
اعىمداعى جىلى اۋىل شارۋاشىلىعى تاۋار وندىرۋشىلەرىنەن 90،7 ملرد تەڭگەگە 3 111 ءوتىنىم ءتۇستى، ونىڭ ىشىندە 64،1 ملرد تەڭگەگە 2 مىڭنان استام قارىز الۋشى قارجىلاندىرىلدى. 15 ساۋىرگە دەيىن قارجىلاندىرۋدىڭ قالعان سوماسىنا 500-دەن استام شارۋا قوجالىعىن نەسيەلەندىرۋ جوسپارلانۋدا.
سونىمەن بىرگە، اۋىل شارۋاشىلىعى تاۋار وندىرۋشىلەرىنەن تۇسكەن وتىنىمدەر كولەمىن، اعىمداعى ماكروەكونوميكالىق جاعدايدى، شارۋالاردىڭ ەگىس ناۋقانىنا جۇمسايتىن شىعىندارىنىڭ ءوسۋىن ەسكەرە وتىرىپ، اگرارلىق نەسيە كورپوراسياسى 70 ملرد تەڭگە كولەمىندە قوسىمشا بيۋدجەت قاراجاتىن تارتۋ بويىنشا بەلسەندى جۇمىس جۇرگىزۋدە. وسىلايشا، 2022-2024 جىلدارعا ارنالعان رەسپۋبليكالىق بيۋدجەتكە ءتيىستى وزگەرىستەر مەن تولىقتىرۋلار ەنگىزۋ قولعا الىندى، قاراجاتتى قابىلداۋدىڭ بولجالدى مەرزىمى – اعىمداعى جىلدىڭ مامىرى.
ەگىستىكتەردى ۋاقتىلى جۇرگىزۋدىڭ كەزەك كۇتتىرمەيتىن قاجەتتىلىگىن ەسكەرە وتىرىپ، كورپوراسيا بيۋدجەتتىك نەسيە قاراجاتىن العانعا دەيىن شارۋالاردى جەكە جانە تارتىلعان قاراجات ەسەبىنەن نەسيەلەندىرۋدى باستادى، كەيىن بۇل قاراجات بيۋدجەتتىك نەسيە قاراجاتىمەن الماستىرىلادى.
نەسيەلەۋ بارلىق وبلىس ورتالىقتارىندا جانە رەسپۋبليكالىق ماڭىزى بار قالالاردا ورنالاسقان 17 فيليال ارقىلى، سونداي-اق كرەديتتىك سەرىكتەستىكتەر، ەكىنشى دەڭگەيدەگى بانكتەر مەن ميكروقارجى ۇيىمدارىن قارجىلاندىرۋ ارقىلى جۇزەگە اسىرىلادى.