2،5 پايىزبەن 5 ملرد تەڭگە: اشم اگرارلىق جوبالارعا نەسيە بەرۋ ءتارتىبىن جاريالادى. نەسيە 10 جىل مەرزىمگە بەرىلەدى.
اۋىل شارۋاشىلىعى مينيسترلىگى اگروونەركاسىپتىك كەشەن سالاسىنداعى جوبالارعا نەسيە بەرۋ قاعيداسىن ازىرلەپ،ونى جاريا تالقىعا ۇسىندى. ەرەجەدە جەرگىلىكتى اتقارۋشى ورگاندار ارقىلى نەسيە اگروونەركاسىپ جوبالارىنا قانداي شارتتارمەن بەرىلەتىنى جازىلعان، دەپ حابارلايدى Almaty-akshamy.kz. informburo.kz-كە سىلتەمە جاساپ.
نەسيەنىڭ نەگىزگى شارتتارى:
- مەرزىمى – 10 جىلعا دەيىن؛
- ەڭ جوعارى سوماسى– 5 ملرد تەڭگەدەن اسپايدى؛
- نومينالدى سىياقى مولشەرلەمەسى – جىلدىق 2،5 پايىزدان اسپايدى.
نەسيە قاراجاتىنا اگروونەركاسىپتىك كەشەن سالاسىنداعى جاڭا جوبالاردى باستاۋ مەن بۇرىن قولعا الىنعان جوبالاردى دامىتۋعا دا بولادى. مۇنداي جوبالارعا كەلەسىلەر جاتادى:
- تاۋارلى ءسۇت فەرماسى (قۋاتى 400 باس مالدان باستاپ)؛
- ەت باعىتىنداعى قۇس فابريكاسى (جىلىنا 5000 توننا قۇس ەتىنەن باستاپ)؛
- كوكونىس ساقتاۋ قويماسى (1000 توننادان باستاپ)؛
- قازىرگى زامانعى سۋ ۇنەمدەۋ تەحنولوگيالارىن (شاشىراتىپ، تامشىلاتىپ سۋارۋ) پايدالانا وتىرىپ، سۋارمالى ەگىنشىلىك (كارتوپ پەن كوكونىستەر، جەمشوپ ءوندىرىسى).
نەسيە الۋ ءۇشىن كەپىل بولۋى مىندەتتى جانە نەگىزگى بورىش پەن سىياقىنى وتەۋ بويىنشا جەڭىلدىكتى كەزەڭ نەسيە بەرۋ مەرزىمى ۇزاقتىعىنىڭ ۇشتەن بىرىنەن اسپايدى.
سونداي-اق، اتالعان نەسيە ءتۇرىن الۋعا ۇمىتكەرلەر كەلەسى تالاپتارعا ساي بولۋى ءتيىس:
- الەۋمەتتىك ماڭىزى بار ازىق-تۇلىك تاۋارلارىنىڭ يمپورتتى الماستىرۋىن ەسكەرە وتىرىپ، سالالىق ورىندىلىعى؛
- ءوڭىر تۇرعىندارىن ساپالى جانە قولجەتىمدى ازىق-تۇلىكپەن قامتاماسىز ەتۋ؛
- ۋاقىتشا جانە تۇراقتى جۇمىس ورىندارىن قۇرۋ؛
- اۋىل حالقىنىڭ تابىسىن ارتتىرۋ شەڭبەرىندە جوبالارمەن ىنتىماقتاستىق جانە كووپەراسيا؛
- اۋىل شارۋاشىلىعى ءونىمىن ءوندىرۋ جانە قايتا وڭدەۋ سالاسىندا كەمىندە 5 جىل جۇمىس تاجىريبەسىنىڭ بولۋى؛
- كرەديتتىك جانە ليزينگتىك مىندەتتەمەلەر بويىنشا مەرزىمى وتكەن بەرەشەكتىڭ 90 كۇننەن ارتىق بولماۋى؛
- بەرىك ازىق بازاسىن قالىپتاستىرۋ، اۋىل شارۋاشىلىعى تەحنيكاسى پاركىن ماتەريالدىق-تەحنيكالىق جاراقتاندىرۋ ءۇشىن اۋىل شارۋاشىلىعى القاپتارىنىڭ بولۋى.
قۇجات جوباسىن جاريا تالقىلاۋ مەرزىمى – 5 شىلدەگە دەيىن.