ءماجىلىستىڭ جالپى وتىرىسىندا «اگلومەراسيالاردى دامىتۋ تۋرالى» زاڭ جوباسى مەن ىلەسپە قۇجات ءبىرىنشى وقىلىمدا ماقۇلداندى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«ءىرى قالالاردا حالىق سانى مەن جەر اۋماعىنىڭ ءوسۋى تۇرعىسىندا ءبىرقاتار پروبلەما بايقالىپ وتىر. وسى ورايدا ينفراقۇرىلىمنىڭ بارلىق تۇرلەرىنە جۇكتەمەنىڭ ارتۋى، قالانىڭ شەت ايماقتارىندا رەتسىز قۇرىلىس سالىنۋى، ەگجەي-تەگجەيلى جوسپارلاۋ جوبالارىنىڭ بولماۋى نەمەسە دۇرىس ىسكە اسپاۋى، ىڭعايلى كولىك جۇيەسىنىڭ بولماۋى، سونداي-اق ينفراقۇرىلىمدىق، الەۋمەتتىك، ونەركاسىپتىك جانە تاعى باسقا نىسانداردىڭ تاپشىلىعى سياقتى تاعى باسقا دا پروبلەمالار بار»، - دەدى ق ر ۇلتتىق ەكونوميكا ءمينيسترى الىبەك قۋانتىروۆ.
ونىڭ ايتۋىنشا، اۋماقتاردىڭ ءتيىستى دەڭگەيدە ۇيلەستىرىلمەي دامۋىنىڭ نەگىزگى سەبەپتەرىنىڭ ءبىرى – اگلومەراسيالاردىڭ دامۋىن رەتتەيتىن نورماتيۆتىك-قۇقىقتىق بازانىڭ بولماۋى.
«وسى ورايدا ورتالىق قالا مەن ونىڭ ماڭىنداعى ايماق اراسىنداعى فۋنكسيالاردى زاڭنامالىق تۇرعىدان ءبولۋ قاجەت. سونىمەن قاتار، وسى سالانى رەتتەيتىن زاڭ جوبالارىن ازىرلەۋ ءۇشىن مەملەكەت باسشىسىنىڭ ءبىرقاتار تاپسىرماسى نەگىز بولدى. پرەزيدەنت 2021 جىلعى 1 قىركۇيەكتەگى قازاقستان حالقىنا جولداۋىندا «اگلومەراسيالاردى دامىتۋ تۋرالى» زاڭدى ازىرلەۋدى تاپسىردى. مۇنىمەن قوسا، مەملەكەت باسشىسى بيىلعى 5 مامىرداعى رەفورمالار جونىندەگى جوعارى كەڭەستىڭ وتىرىسىندا وسى زاڭ جوباسىن بيىلعى جىلدىڭ سوڭىنا دەيىن قابىلداۋدى تاپسىردى. بۇل تۇرعىدا ۇزدىك حالىقارالىق تاجىريبەنى قولدانا وتىرىپ، مينيسترلىك ءتيىستى زاڭ جوبالارىن ازىرلەدى»، - دەدى مينيستر.
ونىڭ سوزىنە قاراعاندا، نەگىزگى زاڭ جوباسى اياسىندا «اگلومەراسيا» تەرمينىنىڭ انىقتاماسى جانە اگلومەراسيالاردى انىقتايتىن ءتيىستى كريتەرييلەر ەنگىزىلەدى. اگلومەراسيا قۇرامىن ۋاكىلەتتى ورگان، ياعني ۇلتتىق ەكونوميكا مينيسترلىگى قالىپتاستىراتىن بولادى جانە ول ق ر ۇكىمەتىنىڭ قاۋلىسىمەن بەكىتىلەدى.
«سونىمەن بىرگە، ەلدى مەكەندەردى اگلومەراسيالاردىڭ قۇرامىنا ەنگىزۋ جانە ولاردىڭ تىزبەسىن جۇرگىزۋ قاعيدالارى مينيسترلىكتىڭ بۇيرىعىمەن بەكىتىلەتىن بولادى. وسى ورايدا، اگلومەراسيالاردى ايقىنداۋدىڭ نەگىزگى كريتەرييلەرى رەتىندە مىنالار تانىلادى: ورتالىق قالانىڭ اكىمشىلىك مارتەبەسى، دەموگرافيالىق سىيىمدىلىق، لوگيستيكالىق الەۋەت، ەكونوميكالىق الەۋەت. زاڭ جوباسى قابىلدانعاننان كەيىن، وسى ولشەمشارتتارعا سايكەس، «اگلومەراسيالار» رەتىندە الماتى، استانا، شىمكەنت، سونداي-اق باسقا دا وبلىس ورتالىقتارى ايقىندالاتىن بولادى»، - دەدى ۆەدومستۆو باسشىسى.
سونىمەن قاتار ول زاڭ جوباسى اياسىندا اگلومەراسيالاردى باسقارۋدىڭ جاڭا مودەلى ەنگىزىلىپ جاتقانىن ايتتى. ايماقتىق دەڭگەيدە جەرگىلىكتى اگلومەراسيا كەڭەستەرى قۇرىلاتىن بولادى.
«ولار اگلومەراسيا اۋماعىن ۇيلەستىرىلگەن تۇردە دامىتۋ ءۇشىن ناقتى ماسەلەلەردى شەشۋ بويىنشا قالا مەن ىرگەلەس وبلىستىڭ جەرگىلىكتى اتقارۋشى ورگاندارىنىڭ ءوزارا ءىس-قيمىل الاڭى رەتىندە جۇمىس ىستەيتىن بولادى. جەرگىلىكتى كەڭەستىڭ قۇرامىنا ەكى اكىمدىكتىڭ جانە ءماسليحاتتاردىڭ وكىلدەرى، سونداي-اق ق ر ۇلتتىق كاسىپكەرلەر پالاتاسىنىڭ جانە ۇكىمەتتىك ەمەس ۇيىمداردىڭ وكىلدەرى كىرەتىن بولادى. جەرگىلىكتى كەڭەس اگلومەراسيانى دامىتۋدى قولداۋعا باعىتتالعان مىندەتتەر مەن شارالار بويىنشا ۇسىنىستار ازىرلەيتىن بولادى. وسى ورايدا، ورنىقتى الەۋمەتتىك-ەكونوميكالىق ءارى ۇيلەستىرىلگەن دامۋدى قامتاماسىز ەتۋ ماقساتىندا جەرگىلىكتى كەڭەس اگلومەراسيانى دامىتۋدىڭ كەشەندى جوسپارىن ازىرلەيتىن بولادى. كەشەندى جوسپار قارجىلاندىرۋ كولەمى مەن كوزدەرىن، ىسكە اسىرۋ مەرزىمدەرىن، جاۋاپتى ورىنداۋشىلاردى، ىسكە اسىرىلاتىن ناتيجەلەردى قامتيتىن بولادى»، - دەدى ءا. قۋانتىروۆ.
اگلومەراسيالاردى دامىتۋ جونىندەگى وڭىرلەر دەڭگەيىندە شەشىمىن تاپپاعان ماسەلەلەر رەسپۋبليكالىق دەڭگەيدە ۇكىمەت جانىنداعى كونسۋلتاتيۆتىك-كەڭەسشى ورگان سانالاتىن اگلومەراسيالار جونىندەگى كەڭەستىڭ قاراۋىنا شىعارىلاتىن بولادى.
نەگىزگى جانە ىلەسپە زاڭ جوبالارى اياسىندا وڭىرلەردىڭ اكىمدىكتەرىنە 25 قوسىمشا وكىلەتتىك بەرىلەدى. نەگىزگى زاڭ جوباسى بويىنشا 11 وكىلەتتىك، ال ىلەسپە زاڭ جوباسى تۇرعىسىندا 14 وكىلەتتىك ەسكەرىلگەن.
«نەگىزگى زاڭ جوباسىنا سايكەس، ورتالىق قالا مەن ىرگەلەس وبلىستاردىڭ اكىمدىكتەرى اگلومەراسيا اۋماعىنداعى جەرگىلىكتى ماڭىزى بار ماسەلەلەردى بىرلەسىپ شەشۋگە، ءتيىستى كەلىسىمدى دايىنداۋعا جانە وعان قول قويۋعا قاتىساتىن بولادى. سونداي-اق اكىمدىكتەر جەرگىلىكتى اگلومەراسيا كەڭەسىن قۇرۋعا جانە ونىڭ قىزمەتىنە، اگلومەراسيانى دامىتۋدىڭ كەشەندى جوسپارىن ازىرلەۋگە قاتىساتىن بولادى. بۇدان باسقا، ورتالىق قالالاردىڭ جەرگىلىكتى اتقارۋشى ورگاندارى قالا ماڭى ايماعىن دامىتۋدىڭ باس جوسپارىن ىسكە اسىرۋ بويىنشا سۋبەكتىلەردىڭ قىزمەتىن ۇيلەستىرەدى، باس جوسپاردىڭ جوباسىن ازىرلەۋدى ۇيىمداستىرادى، سونداي-اق ساۋلەت، قالا قۇرىلىسى جانە قۇرىلىس قىزمەتى سالاسىنداعى مەملەكەتتىك نورماتيۆتەردىڭ جوبالارىنا كەلىسىم بەرەدى»، - دەپ ناقتىلادى مينيستر.