الماتىدا اينالانى قوقىستان تازارتىپ، اعاش ەگۋ ەكولوگيالىق اكسياسى ءوتىپ جاتىر. "كوكجيەك" ىقشاماۋدانىنداعى سەنبىلىكتى «قازاقستاندى كوگالداندىرۋ» قاۋىمداستىعىنىڭ بەلسەندىلەرى ۇيىمداستىردى.
– قاۋىمداستىق 2015 جىلدان بەرى جۇمىس ىستەيدى. ءبىز كوگالداندىرۋمەن اينالىسامىز. ءقازىر ءبىزدىڭ قاتارىمىزدا تەك الماتى عانا ەمەس، بۇكىل قازاقستان بويىنشا جۇزدەن استام كومپانيا بار. قاۋىمداستىق بىرنەشە سالا ماماندارىن بىرىكتىرىپ وتىر. ءبىز قالا اكىمدىگىمەن تىعىز بايلانىس ورناتىپ قانا قويماي، جاسىل جەلەك بويىنشا ەرەجەلەردى بىرلەسىپ ازىرلەۋ، كونسۋلتاسيالىق كومەك كورسەتۋ جۇمىسىنا اتسالىسىپ، سونداي-اق وسى تەكتەس اكسيالاردى وتكىزۋدە ءوزىمىزدىڭ كاسىبي كومەگىمىزدى ۇسىنامىز. بۇگىن 200 اكاسيا اعاشى وتىرعىزىلادى. ءبىزدىڭ ماماندار بۇل اعاشتاردى قالاي دۇرىس ەگىپ، ونى باپتاۋ كەرەكتىگىن ايتىپ قانا قويماي، بۇكىل پروسەستى باقىلايدى. ءوز بەتىمەن اعاش وتىرعىزعىسى كەلەتىن بەلسەندىلەرگە ەڭ اۋەلى قالالىق اكىمدىككە، سونىڭ ىشىندە ەكولوگيا جانە قورشاعان ورتا باسقارماسىنا حابارلاسۋ كەرەكتىگىن ايتامىن. باسقارما كومەك كورسەتىپ، جەر ءبولىپ قانا قويماي، ءبىرقاتار ۇسىنىس تا بەرەدى. بۇل رەتتە اعاش ەگۋ جەتكىلىكسىز. وعان دۇرىس كۇتىم دە جاساي ءبىلۋ كەرەك، – دەدى «قازاقستاندى كوگالداندىرۋ» قاۋىمداستىعىنىڭ پرەزيدەنتى تاتيانا انتونەنكو.