اعا باپكەر: دارحان - جاستارعا ۇلگى بولاتىن جان

كاراتەدەن تۇڭعىش وليمپيادا جۇلدەگەرى.

كاراتەدەن قازاقستان كومانداسىنىڭ اعا جاتتىقتىرۋشىسى دۋلاتبەك قۇسبەكوۆ Olympic.kz سايتىنا سۇحبات بەرىپ، دارحان ءاسادىلوۆتىڭ جارتىلاي فينالدىق جەكپە-جەگىنە قاتىستى ءوز پىكىرىمەن ءبولىستى، دەپ حابارلايدى Almaty-akshamy.kz.

«دارحان بۇل وليمپياداعا ماقساتتى تۇردە دايىندالدى. ول - بارلىق جاس سپورتشى ۇلگى تۇتاتىن، بارشا كاراتەشىلەرگە جول كورسەتەتىن تالانتتى سپورتشى. ول توكيوعا التىن ءۇشىن باردى، قازاقتىڭ كوك بايراعىن ەڭ بيىكتەن كوتەرەمىن دەگەن ويدا بولدى. ءبىراق بۇل سپورت، قولا جۇلدەنى قاناعات تۇتامىز.

ارينە، ىشىمىزدە «اتتەگەن-اي» قالدى. وكىنىش بار. دارحان جارتىلاي فينالداعى قارسىلاسىمەن بۇرىن-سوڭدى كەزدەسپەگەن. ويتكەنى، ەكەۋى ەكى سالماقتا ونەر كورسەتىپ كەلدى. ءاسادىلوۆ 60 كەلىگە دەيىنگى، ستيۆەن دە كوستا 67 كەلىگە دەيىنگى سالماقتا ب ا ق سىنايدى. ەكەۋى دە ءوز سالماقتارىندا توكيو ويىندارىنا مەرزىمىنەن بۇرىن جولداما العان.

ال وليمپيادا كەزىندە ەكى جەڭىل جانە ەكى اۋىر سالماق بىرىگىپ كەتتى. سول سەبەپتى سالماعى اۋىر جانە بويى ۇزىنداۋ قارسىلاسپەن كەزدەسۋ دارحانعا قيىنداۋ بولعان سياقتى.

دەسە دە، مۇنىڭ ءوزى ۇلكەن كورسەتكىش. دارحان ءاسادىلوۆ كاراتەدەن وليمپيادانىڭ العاشقى جۇلدەسىن العان قازاق بالاسى رەتىندە تاريحتا قالدى. بۇل جاس سپورتشىلارىمىزدى العا جەتەلەيتىنى ءسوزسىز»، - دەدى اعا باپكەر دۋلاتبەك قۇسبەكوۆ.