قازىرگى كەزدە شاتىرلاردى جەتكىزۋ جانە ورناتۋ جۇمىستارى جۇزەگە اسىرىلىپ جاتىر.
تۇركيا ۇكىمەتى جانىنداعى اپاتتار مەن توتەنشە جاعدايلار سالدارىن جويۋ باسقارماسىنىڭ (AFAD) قىزمەتكەرلەرى كاحرامانماراشتاعى ەپيسەنترلى جەر سىلكىنىستەرىنەن زارداپ شەككەن پروۆينسيالاردا 300 809 شاتىر ورناتۋدى اياقتادى، دەپ حابارلايدى اlmaty-akshamy.kz Azattyq Ruhy -نا سىلتەمە جاساپ.
AFAD حابارلاعانداي، جەر سىلكىنىسى سالدارىنان زارداپ شەككەندەر ءۇشىن اپات ايماعىنا شاتىرلار جىبەرۋ اپات سوققىسىنان كەيىنگى العاشقى كۇندەردەن باستاپ ءالى دە جالعاسىپ جاتىر. 6 اقپاننان باستاپ جەر سىلكىنىسىنەن زارداپ شەككەن پروۆينسيالارداعى 270 اۋداندا لاگەرلەر قۇرىلدى.
«حاتاي پروۆينسياسىندا جەر سىلكىنىسىنەن كەيىن 69 766، كاحرامانماراش پروۆينسياسىندا - 66 685، گازيانتەپ پروۆينسياسىندا - 49 670، ادىيامان پروۆينسياسىندا - 45 852، مالاتيادا - 25 380، ادانادا - 17 515، شانلىۋرفادا - 8 838، وسمانيادا - 7 170، ديارباكىر - 6 328، كيليستە 3 605 شاتىر تىگىلدى»، - دەپ ءتۇسىندىردى AFAD.
ەسكە سالايىق، 6 اقپاندا تۇركيانىڭ وڭتۇستىك-شىعىسىندا ماگنيتۋداسى 7 بالدان اساتىن ەكى جەر سىلكىنىسى بولدى (جەرگىلىكتى ۋاقىت بويىنشا 04.17 - دە – 7،7 بالل جانە 13.24-تە-7،6 بالل).
تۇركيانىڭ وڭتۇستىك-شىعىسىنداعى جويقىن جەر سىلكىنىسى سالدارىنان قازا تاپقاندار سانى 42،3 مىڭنان استى.
پرەزيدەنت رەجەپ تايىپ ەردوعان تۇركيادا تابيعي اپات قۇرباندارى ءۇشىن جالپىۇلتتىق ازا تۇتۋ تۋرالى جاريالادى. تۇركيانىڭ مەملەكەتتىك تۋلارى بۇكىل ەل بويىنشا تومەندەتىلدى.
ايتا كەتەيىك، قازاقستان پرەزيدەنتى قاسىم-جومارت توقايەۆ اپات ورىن العان العاشى كۇنى-اق تۇركيا رەسپۋبليكاسىنا قوسىمشا گۋمانيتارلىق كومەك جىبەرۋ جونىندە ۇكىمەتكە تاپسىرما بەردى. سونداي-اق مەملەكەت باسشىسى شۇعىل جاردەم رەتىندە 1 ميلليون دوللار بولىنەتىنىن حابارلاعان ەدى. بۇدان بولەك، ءقازىر ءزىلزالا بولعان ايماقتا قازاقستاندىق قۇتقارۋشىلار دا ادامداردى ىزدەستىرۋ جۇمىستارىنا بارىپ قايتتى. ال قازاقستاندىق ەرىكتىلەر كاحرامانماراش قالاسىندا 100-دەن استام قازاق ءۇيىن تىكتى.
بۇدان بولەك، الەمگە تانىمال قازاقستاندىق ءانشى ديماش قۇدايبەرگەن Stranger الەمدىك تۋرنە-كونسەرتىنىڭ بيلەتتەرىنەن تۇسكەن قارجىنىڭ ءبىر بولىگىن تۇركياداعى جەر سىلكىنىسىنەن زارداپ شەككەندەرگە كومەك رەتىندە اۋدارماق.