قازاقستاندا اتوم ەلەكتر ستانسياسىن سالۋ قاجەتتىلىگى كوپتەن بەرى تۋىنداعان. بۇعان كوپتەگەن سەبەپتەر بار، ءبىراق ەڭ باستىسى – ەل ەكونوميكاسىنىڭ ءوسۋى جانە ەنەرگيا تۇتىنۋدىڭ ارتۋى.
قازىرگى تاڭدا قازاقستان رەسەيدەن ەلەكتر ەنەرگياسىن ساتىپ الۋعا ءماجبۇر. KEGOK جۇيەسىنىڭ ديسپەچەرلىك دەرەكتەرىنە سايكەس، 2023 جىلى قازاقستان رەسەيدەن 4،99 ميلليارد كۆت•ساعات ەلەكتر ەنەرگياسىن يمپورتتادى، بۇل 2022 جىلعى 1،93 ميلليارد كۆت•ساعاتقا قاراعاندا ەداۋىر كوپ.
مەنىڭ بىلۋىمشە، ءبىز بۇل ماسەلەدە قىرعىزستاننىڭ دا قولداۋىن ىزدەگەن ەدىك. ءوزىمىزدىڭ اتوم ەلەكتر ستانسياسى بىزگە يمپورتتى ازايتىپ، باسقا ەلدەرگە تاۋەلدىلىكتى تومەندەتۋگە مۇمكىندىك بەرەدى. سونىمەن قاتار، جاڭا جۇمىس ورىندارى اشىلادى، بۇل دا وتە ماڭىزدى. اتوم ستانسياسىنىڭ زيانى زور دەگەن قورقىنىشتار بىزگە گەنەتيكالىق دەڭگەيدە سىڭگەن. ويتكەنى، كەڭەستىك كەزەڭدە قازاقستان اۋماعىندا يادرولىق سىناقتار وتكىزىلگەن بولاتىن. ونىڭ سالدارىن ءالى كۇنگە دەيىن تارتىپ كەلەمىز، سەبەبى بۇل بىرنەشە ۇرپاقتىڭ دەنساۋلىعىنا اسەر ەتتى. الايدا، جاپونياعا قاراڭىزشى. حيروسيما مەن ناگاساكي قالالارىنىڭ قايعىلى وقيعالارىن باسىنان وتكەرگەن ەل بۇگىندە اتوم ەلەكتر ستانسيالارىن سالىپ، يادرولىق ەنەرگيانى بەيبىت ماقساتتا پايدالانىپ جاتىر.
ءبىز دە وسى باعىتتا الدىڭعى قاتارلى ەلدەردىڭ تاجىريبەسىن ۇيرەنۋىمىز كەرەك. قازاقستاندا بۇل ءۇشىن بارلىق جاعداي جاسالعان. بىزدە ۋران قورى مول. مىسالى، جاقىندا ۋران كەن ورىندارىنداعى مينەرالدار قورىنىڭ 89 مىڭ تونناعا وسكەنى بەلگىلى بولدى. بۇل گەولوگيالىق بارلاۋ جۇمىستارىنىڭ باعدارلاماسى اياسىندا مۇمكىن بولدى.
ەڭ باستىسى، بىزدە وسى سالادا ۇلكەن تاجىريبەسى بار ماماندار بار. مىسالى، الماتىداعى يادرولىق فيزيكا ينستيتۋتىن الايىق. بۇل – ىرگەلى جانە قولدانبالى زەرتتەۋلەرمەن اينالىساتىن ورتالىق، وندا جەتەكشى عالىمدار جۇمىس ىستەيدى. بءىز ەڭ وزىق تاجىريبەگە سۇيەنە وتىرىپ اتوم ەنەرگياسىن بەيبىت ماقساتتا پايدالانۋىمىز كەرەك.