اتوم ەلەكتر ستانساسىنىڭ سالىناتىن-سالىنبايتىنىن حالىق شەشەدى.
دەگەنمەن، ەلىمىز ءۇشىن تازا اتوم ەنەرگياسىنىڭ ماڭىزى زور ەكەنىن ايتقان قاسىم-جومارت توقايەۆ باستامانى جالپىحالىقتىق رەفەرەندۋمعا شىعارۋدى ۇسىنعانىن ايتتى، دەپ حابارلايدى Almaty-akshamy.kz.
24.kz مالىمەتىنشە، جالپى اەس سالۋ ماسەلەسى بويىنشا قوعامدىق تالقىلاۋلار وتكىزىلەدى. قۇرىلىستى جاقتاعان نەمەسە قارسى بولعان ساراپشىلاردىڭ پىكىرلەرى بارىنشا تارازىلانىپ، شەشىم قابىلدانادى. پرەزيدەنت جوبانىڭ قۇنى مەن ەكولوگياعا اسەرىن قاپەردەن شىعارماي، ماسەلەنى عىلىمي زەرتتەۋلەر نەگىزىندە شەشكەن ءجون دەدى.
«قازاقستان ءۇشىن تازا اتوم ەنەرگياسىنىڭ ءمانى زور. بۇل – ەل ەكونوميكاسىنىڭ بولاشاعىنا تىكەلەي اسەر ەتەتىن ايرىقشا ماڭىزدى ماسەلە. ءبىز تابيعي ۋران ءوندىرۋ كولەمى جاعىنان الەمدە ءبىرىنشى ورىن الامىز. يادرولىق وتىن كومپونەنتتەرىن دە ءوزىمىز وندىرەمىز. سول سەبەپتى مەن ەلىمىزدىڭ اۋماعىندا اەس سالۋ جايىنا ايرىقشا ءمان بەرەمىن. تۇپتەپ كەلگەندە، ەنەرگەتيكا قاۋىپسىزدىگى ماسەلەسىن گەوساياسي مۇددە ەمەس، ناقتى قاجەتتىلىك پەن مۇمكىندىكتەر تۇرعىسىنان قاراستىرىپ، عىلىمي زەرتتەۋلەر نەگىزىندە شەشكەن ءجون»، - دەيدى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ.