Satbayev Universityء-دىڭ جالپى فيزيكا كافەدراسىنىڭ وقىتۋشىسى، جاپونيادا ءبىلىم العان ديدار شوقوۆ اتوم ەلەكتر ستانسياسىن سالۋدى قولدايدى، دەپ حابارلايدى aqshamnews.kz
– 2011 جىلدان كەيىن جاپونيا اتوم ەنەرگەتيكاسى بويىنشا ەڭ قاتاڭ قاۋىپسىزدىك ستاندارتتارىن ەنگىزدى. بۇل ستاندارتتار الەمدەگى ەڭ ءقاۋىپسىز بولىپ سانالادى. وسىعان بايلانىستى قازاقستان ولاردىڭ تاجىريبەسىن تولىقتاي پايدالانا الادى، – دەدى عالىم.
قاۋىپسىزدىكتى قامتاماسىز ەتۋ ءۇشىن مامان سەنىمدى جەتكىزۋشىلەر مەن سەرىكتەستەردى دۇرىس تاڭداۋدىڭ ماڭىزدىلىعىن اتاپ ءوتتى. ونىڭ پىكىرىنشە، اەس قۇرىلىسىنا كەم دەگەندە ون جىل قاجەت بولادى.
– مەنىڭ ويىمشا، اتوم ەلەكتر ستانسياسى ەلىمىزدىڭ ەنەرگەتيكالىق قاۋىپسىزدىگىن ارتتىرادى. اەس – دۇرىس پايدالانىلعان جاعدايدا وتە سەنىمدى جانە ءقاۋىپسىز نىسان، ءارى بولاشاعى زور ەنەرگيا كوزى. ارينە، باسقا دا ستانسيالار سياقتى ونىڭ دا ءوز كەمشىلىكتەرى بار، ءبىراق ارتىقشىلىقتارى باسىمىراق، – دەپ اتاپ ءوتتى ديدار شوقوۆ.
عالىم اەس-تى جەو-مەن سالىستىرا وتىرىپ، العاشقىسىنىڭ ەكولوگيالىق ارتىقشىلىقتارىنا توقتالدى.
– جەو قورشاعان ورتانى قاتتى لاستايدى. اەس-تىڭ دە ءوز لاستاۋ كوزدەرى بار، ءبىراق ولار نەگىزىنەن يادرولىق وتىن قالدىقتارىنا قاتىستى. بۇگىنگى عىلىم بۇل قالدىقتاردى وقشاۋلاپ، ساقتاۋدى جاقسى مەڭگەرگەن. ال جەو-دان شىعاتىن شاڭ مەن گازدارمەن ءالى كۇرەسۋدىڭ ءتيىمدى ءادىسى تابىلعان جوق. يادرولىق قالدىقتاردىڭ ەكولوگياعا عالامدىق اسەرى جوق، – دەپ سانايدى ول.
ديدار شوقوۆتىڭ پىكىرىنشە، اەس قۇرىلىسى قازاقستانعا كەم دەگەندە 10-15 ميلليارد دوللار ينۆەستيسيا تارتادى. ەگەر شەتەلدىك كومپانيالار قۇرىلىسقا قاتىسسا، بۇل كوپتەگەن جاڭا جۇمىس ورىندارىن اشادى.
– قۇرىلىس پەن پايدالانۋ ءۇشىن بىرنەشە مىڭ بىلىكتى مامان قاجەت بولادى. بۇل قازاقستان عىلىمىنا دا وڭ اسەر ەتەدى. ۇزاق مەرزىمدى پەرسپەكتيۆادا بۇل جوبا ەلىمىزدىڭ ءارتۇرلى سالالارىنا كوپتەگەن وڭ اسەرىن تيگىزەدى، – دەپ قورىتىندىلادى عالىم.