اەس الماتى وبلىسىندا سالىنادى

بۇل تۋرالى ق ر ەنەرگەتيكا مينيسترلىگى ءمالىم ەتتى.

جۇرگىزىلگەن زەرتتەۋلەردىڭ قورىتىندىسى بويىنشا اتوم ەلەكتر ستانسياسى قۇرىلىسىنىڭ ەڭ قولايلى اۋدانى رەتىندە الماتى وبلىسى جامبىل اۋدانى ۇلكەن اۋىلىنىڭ اۋماعى تاڭدالدى، دەپ حابارلايدى Almaty-akshamy.kz

مەملەكەت باسشىسىنىڭ قازاقستاندا اتوم ەنەرگەتيكاسىن دامىتۋ مۇمكىندىگىن زەردەلەۋ جونىندەگى تاپسىرماسىن ورىنداۋ ماقساتىندا رەاكتورلىق تەحنولوگيالاردى تاڭداۋ بويىنشا بۇرىن جۇرگىزىلگەن زەرتتەۋلەردى وزەكتەندىرۋ، اتوم ەلەكتر ستانسياسىنىڭ قۋاتى مەن قۇرىلىس اۋدانىن انىقتاۋ بويىنشا جۇمىستار جۇرگىزىلدى.

ەلدەگى العاشقى اتوم ەلەكتر ستانسياسى ءۇشىن ۇقساس ستانسيانى سالۋ جانە ءساتتى پايدالانۋ تاجىريبەسىندە تەكسەرىلگەن تەحنولوگيانى تاڭداۋ ۇسىنىلادى. وسىعان بايلانىستى يادرولىق تەحنولوگيالاردىڭ مىناداي الەۋەتتى جەتكىزۋشىلەرىنەن تۇراتىن "ءشورت-تىزىم" جاسالدى:

HPR-1000 قىتايلىق CNNC كومپانياسى؛

APR-1400 رەاكتورى بار كورەي KHNP كومپانياسى؛

ۆۆەر-1200 جانە ۆۆەر-1000 رەاكتورلارى بار رەسەي روساتوم كومپانياسى؛

EPR-1200 رەاكتورى بار فرانسۋز EDF كومپانياسى.

زەرتتەۋ ناتيجەلەرى 2022 جىلعى مامىردا اتوم سالاسىن دامىتۋ جونىندەگى ۆەدومستۆوارالىق كوميسسيانىڭ وتىرىسىندا قارالدى جانە ماقۇلداندى.

"اتوم ەنەرگياسىن پايدالانۋ تۋرالى" قازاقستان رەسپۋبليكاسى زاڭىنىڭ 12-بابىنا سايكەسيادرولىق قوندىرعىلاردى سالۋ جانە سالۋ اۋدانى تۋرالى شەشىمدى اۋماعىندا قوندىرعى سالۋ جوسپارلانىپ وتىرعان جەرگىلىكتى وكىلدى ورگانداردىڭ كەلىسىمىمەن قازاقستان رەسپۋبليكاسىنىڭ ۇكىمەتى قابىلدايدى. بۇل رەتتە ءماسليحات جەرگىلىكتى وكىلدى ورگان بولىپ تابىلادى.

وسىعان بايلانىستى، 2022 جىلعى قاراشادا الماتى وبلىسى ءماسليحاتىنىڭ كەزەكتى سەسسياسىندا اۋدان تۇرعىندارىن قولداۋ شارتىمەن قۇرىلىسقا كەلىسىم بەرۋ تۋرالى شەشىم قابىلداندى.