قازاقستاندا ءوزىنىڭ ناقتى تابىسىن جاسىرىپ، اليمەنت تولەمەي جۇرگەن ازاماتتارعا قاتىستى ماسەلە شەشىمىن تاپتى. ادىلەت مينيسترلىگى «Smart Data Ukimet» پلاتفورماسىندا جالاقى مولشەرىن تومەندەتكەن دەرەكتەردى انىقتايتىن اناليتيكالىق كەيستى ىسكە اسىردى. بۇل تۋرالى وكق الاڭىندا ق ر ادىلەت ۆيسە-مينيسترى بەكبولات مولدابەكوۆ مالىمدەدى.
ادىلەت مينيسترلىگى ۇلكەن دەرەكتەردى زەرتتەۋ ارقىلى ەڭ تومەنگى جالاقى مولشەرىن كورسەتىپ، اليمەنت تولەمەي جۇرگەن ازاماتتاردى انىقتاۋعا مۇمكىندىك الدى. بۇل ماسەلەنى تولىعىمەن جويۋ ءۇشىن مينيسترلىك مكك-مەن بىرلەسىپ جۇمىس جۇرگىزۋدى جوسپارلاپ وتىر.
كەلەسى جوبا - «جسو-روبوت». بۇرىن، ەگەر ازامات سەرگەك كامەراسىنا ءتۇسىپ، تاعايىندالعان ايىپپۇلدى 50 كۇن ىشىندە تولەمەگەن بولسا، وندا بۇل ءىس جەكە سوت ورىنداۋشىلارىنا بەرىلەتىن. قىزمەتكەر شوتتى شەكتەپ، ايىپپۇلدىڭ 25%-ن 10 اەك-كە دەيىنگى سوماسىن ءوندىرىپ الاتىن. ەندى ازاماتتار جىل سايىن وسى روبوتتىڭ ارقاسىندا 2،2 ملرد تەڭگە ۇنەمدەيدى. ەگەر ازامات تولەمدى 50 كۇننەن كەشىكتىرسە، قوسىمشا SMS، Push-حابارلامالاردى بانكتەردىڭ قوسىمشالارى ارقىلى جىبەرۋ جوسپارلانعان، بۇل قارجى وندىرمەۋ ءۇشىن جاسالادى.
تاعى ءبىر جاڭالىق – ازاماتتارعا قۇقىقتىق قولداۋ «ە-زاڭ كومەگى» جۇيەسى ارقىلى كورسەتىلەتىن بولادى. 1 شىلدەدەن باستاپ بۇل جۇيە بەينەكونفەرەنسيا رەجيمىندە جۇمىس ىستەيدى.
«زاڭ كەڭەسشىسى نەمەسە ادۆوكات ءسىز ءۇشىن ءاردايىم قولجەتىمدى بولادى. كەز كەلگەن جاعدايدا وعان قوڭىراۋ شالىپ، كەڭەس الا الاسىز»، - دەپ ءتۇسىندىردى ۆيسە-مينيستر.
«ە-زاڭ كومەگى» ءموبيلدى قوسىمشاسىندا جاساندى ينتەللەكتپەن چات-بوت ەنگىزۋ جوسپارلانۋدا. بۇل ازاماتتارعا 24/7 رەجيمىندە قۇقىقتىق سۇراقتارعا جاۋاپ الۋعا مۇمكىندىك بەرەدى.