ادەبيەت پەن مادەنيەت قايراتكەرلەرى تيۋركسوي-دىڭ التىن مەدالىمەن ماراپاتتالدى

تيۋركسوي ۇيىمىنىڭ 30 جىلدىق مەرەيتويى ءوتتى.

مەرەيتويلىق شارالاردىڭ قورىتىندى سالتاناتىندا تۇركى دۇنيەسىنىڭ ادەبيەتى مەن ونەرىنە قوسقان زور ۇلەسى ءۇشىن بيبىگۇل تولەگەنوۆا، ولجاس سۇلەيمەنوۆ جانە مۇرات اۋەز تيۋركسوي ۇيىمىنىڭ ەڭ بيىك ماراپاتى - ONUR NISANI - قۇرمەت بەلگىسى - التىن مەدالىمەن ماراپاتتالدى، دەپ حابارلايدى Almaty-akshamy.kz

«بىرىككەن دە، بولىنگەن دە زامان ءوتتى. توق بولعان دا، جوق بولۋعا تاياعان دا داۋىرلەر ءوتتى. ءوتتى، ءبىراق ءالى كەتە قويعان جوق. ءقاۋىپ قاشاندا قابىرعا سىرتىندا» - دەدى مۇرات اۋەز تيۋركسوي ۇيىمىنىڭ 30 جىلدىق مەرەيتويى اياسىندا ءوتىپ جاتقان كىتاپ كورمەسىنىڭ اشىلۋ سالتاناتىندا.

كۇنى كەشە عانا سولتۇستىك كورشىمىزدىڭ وزىمەن باۋىرلاس حالىقتىڭ جۇرتىن جەر بەتىنەن جوق قىلىپ جىبەرۋ جولىنداعى اقىلعا سىيمايتىن ارپالىسىنىڭ كۋاسى بولىپ وتىرمىز. قانشاما حالىق قىرىلدى، قاڭعىپ، بوسىپ كەتتى، ءالى دە قانشاما بوزداقتىڭ سورى، ادامزاتتىڭ ازابى تۇرعانى بەلگىسىز.

قانشا جەردەن بەتى اۋلاق دەگەنىمىزبەن، ءقاۋىپ، مىنە، كوز الدىمىزدا، شىنىمەن دە قابىرعامىزدىڭ سىرتىندا عانا تۇر.

قاي زاماندا دا حالىقتىڭ ەڭسەسىن كوتەرىپ، جانىن جادىراتىپ، كوڭىلىنە قۋانىش، جۇرەگىنە رۋح بەرگەن - ونەر، ءبىلىم، مادەنيەت جانە سونى جاساۋشى زيالى قاۋىم. تەڭىزدىڭ تامشىسىنداي عانا بولىپ كورىنەتىن جازىلعان ەڭبەك، سالىنعان سۋرەت، جاسالعان تۋىندى بىرىگە-بىرلەسە كەلە كوزى قاراقتى وقىرمان مەن كورەرمەندى ياكي قاراپايىم حالىقتى ءوزىنىڭ اينالاسىنا جينارى حاق.

مىنە، سونىڭ ناتيجەسى رەتىندە سوڭعى كۇندەرى الماتى قالاسىندا تۇرىك حالىقتارىنىڭ زالقار زيالىلارى باس قوسىپ، بەرەكە-بىرلىك سالتاناتىن بىرگە اتقاردى.