راحمەت
قۇربىم ەكەۋمىز ساۋدا ورتالىعىندا ۇيىمداستىرىلعان ۆيكتورينالىق ويىنعا قاتىسىپ، جۇمساق ويىنشىق ۇتىپ الدىق. قايتار جولدا اكەسىمەن كەلە جاتقان اقىل-ەسى كەم بالانى كوردىك تە، ويىنشىعىمىزدى سوعان ۇستاتتىق. بالا بىزگە «راحمەت» دەدى. اكەسىنىڭ كوزى جاساۋراپ، جىلاپ جىبەرە جازدادى. سويتسەك، بالا بىرنەشە ايدان بەرى مۇلدەم سويلەمەگەن ەكەن.
دوستىق
ءتورت اي بۇرىن دارىگەرلەر ماعان شاشىمنىڭ تۇسەتىنىن ايتقان. شىنىمەن دە شاشىم ءتۇسىپ، تاقىرلانىپ قالدى. مەكتەپكە بارۋعا، سىنىپتاستارىمنىڭ كوزىنە تۇسۋدەن قورىقتىم. ماعان ءبارى ساۋساعىن شوشايتىپ، كۇلەتىن سياقتى بولىپ كورىندى. ەرتەڭىنە ەسىك قاعىلدى. اشسام، ەسىك كوزىندە ونشاقتى دوسىم تۇردى، ءبارى شاشىن تاقىرلاپ الىپ تاستاعان. ولاردىڭ ەكەۋى قىز بالا ەدى...
جۇرەك
ۇيگە تاڭعا جۋىق ورالدىم. كىرەبەرىستەن «قۇرمەتتى كورشىلەر! بۇگىن شامامەن ساعات 9.20-دا ەسىك الدىندا 120 سومىمدى جوعالتىپ الدىم. تاۋىپ الساڭىزدار، ءوتىنىش، اكەپ بەرسەڭىزدەر، 76-پاتەر، انتونينا پەتروۆناعا. زەينەتاقىم 1640 سوم» دەگەن حابارلاندىرۋدى كوزىم شالدى.
قالتامداعى بار اقشامدى جيناپ، قولىما 120 سومدى قىسا ۇستاپ، جوعارىعا كوتەرىلدىم. 76-پاتەردەن الدىنا فارتۋك بايلاعان اجەي شىقتى. مەنى جانە قولىمداعى اقشانى كورە سالىپ، باس سالىپ قۇشاقتاي الدى. كوزىندە قۋانىشتىڭ جاسى بار. «ۇن الۋعا شىققان ەدىم. پودەزگە تاياپ، كىلتىمدى الىپ جاتقاندا ءتۇسىرىپ العان بولۋىم كەرەك اقشامدى»، – دەپ سالدىرلاپ اڭگىمەسىن ايتىپ جاتىر. ءبىراق! اقشامدى الۋدان باس تارتتى. سەبەبى، مەن وسى جارتى ساعاتتىڭ ىشىندە اجەيدىڭ اقشاسىن «تاۋىپ العان» 6-شى ادام ەكەنمىن. ادامدار، مەن سىزدەردى جاقسى كورەمىن!
داڭق
ينستيتۋتتان كەلە جاتىپ، «اۆتوزاۆودسكايا» مەتروبەكەتىنىڭ جانىندا وتىرعان سوعىس ارداگەرىن كوردىم. الدىنا وردەن-مەدالدارىن جايىپ قويىپتى... سۇراپىل سوعىستا قان كەشىپ ءجۇرىپ العان ماراپاتتارى. تاماق الۋ ءۇشىن ساتىپ وتىرعانىن ۇقتىم. قالتامداعى اقشامدى تۇگەل شىعارىپ ۇسىندىم دا: «اتا، مەنىڭ اقشامدى الىڭىزشى، ءبىراق ارىڭىز بەن داڭقىڭىزدى وعان تۇرمايتىن ادامدارعا تيىن ءۇشىن ساتپاڭىزشى، وتىنەمىن...» دەدىم تاماعىما وكسىك كەپتەلىپ. اتاي جىلاپ قالدى، اقشانى الدى دا، وردەن-مەدالدارىن الاقانىنا سالىپ جاتىپ ءسۇيىپ قويدى سىرتىنان. «راحمەت، قىزىم!» - دەدى كوز جاسىن جاسىرىپ. مەنىڭشە، الەمدى وسىنداي بولماشى قادامدارمەن دە وزگەرتۋگە بولادى.
ىزگىلىك
مەنىڭ ءىنىم 13-تە. ول قاتەرلى ىسىك اۋرۋىنا شالدىققان. ءىنىمدى كلينيكادا جالعىز قالدىرماس ءۇشىن، اكەم ءبىر جىلعا اقىسىز دەمالىسقا شىقتى. ءبىراق جۇمىس ورنى ءبىر جىل بويىنا وعان جالاقىسىن تولەپ تۇردى. جاڭا زەلانديا پوليسياسىندا عاجاپ ادامدار ەڭبەك ەتەدى!
ورىسشادان اۋدارعان نۇر جامال.